Tšeliso Thakholi Litlholisano tsa mokhahlelo oa pele oa Liki e Kholo ea Bolo ea Maoto ea Basali (WSL) li tlil’o thakhoha Mabaleng a Koetliso ea Sepolesa (PTC) Maseru le DiFA Maputsoe mafelong ana a beke ka Sontaha sa la 29 Loetse 2024.
Ha li thakhoha feela letsatsing leo la pele Lijabatho ladies ea Morija, e tla amohela Sehlopha sa Sekolo se Phahameng sa Mphaki Seterekeng sa Quthing, Lebaleng la PTC ka 10:00 hoseng. Hona sebakeng se tšoanang bompoli ba bolo ea maoto ea basali, e leng LDF Ladies ea Ha Ratjomose ba thulane sa lipheleu le Sehlopha sa Thaba-Tseka Ladies ho hlaha Seterekeng sa Thaba-Tseka.
Haele papali ea ho qetela e tlang ho bapalloa PTC ke e lipakeng tsa LMPS Ladies le Bantu Ladies ho hlaha ka Bokaota. Ena e tlilo ba papali e boima haholo kaha LMPS Ladies e ke ke ea lumela ho tla shapeloa habo eona, kapel’a barati le bats’ehetsi ba eona. Athe Bantu Ladies le eona e tla be e batla ho hlakola Maele a Sesotho a reng: “ha e ke e qaloa mokoting.”
Lipapali tsa ho qetela tsa letsatsi leo ke tse tlang ho ba Lebaleng la DiFA Maputsoe moo lihlopha tse peli tse ncha Liking ea Basali e leng FC Stoko e tla be e momane le sa Kick4Life, ha Bokamoso College Ladies e tla kopana le Berea Ladies.
Haele ka ho tsa A Division tse neng li lokela ho simolla Liki ka Moqebelo oa la 21 Loetse monongoaha, ha li’a ka tsa tsoelapele ka lebaka la maemo a sa jeseng litheohelang ba leholimo. Athe letsatsing la Sontaha maputulo a se a ntse a bonahala e sa le sethathong kaha ka Liking e ka boroa ea A Division sehlopha sa bolo ea maoto sa sepolesa se bitsoang Sehenehene se ile sa halala sa Lerotholi ‘Ka Lihale’ ka ho e tlabola ka phafa ea 3-1.
CCX le Kick4Life li ile tsa pitikisa mahe(0-0). Ka mona ka Liking e ka Leboea ea A Division FC Summit e ile ea amohela sehlopha se theohang lihlopheng tse Kholo tsa Premier, e leng Naughty Boys ka ho e teteka ka phafa ea 2-0. Haele O5 United le Sehlopha sa Sepolesa sa Quthing tsona li ile tsa bapala ka seahlolo sa 1-1.
