Tšeliso Thakholi Banka ea Standard Lesotho e nehelane ka mpho ea mekotla e 100 ea lijo tsa likhoho le likhoho tsa mahe tse 300 tsa boleng ba chelete e kalo ka M66,740.00, ho Lehae la Bana ba Likhutsana la St. Cecilia, tšebeletsong e bileng St. Cecilia, Ha Buasono ka la 21 Mphalane 2024.
H’a bua tšebeletsong ena Letona la Lekala Tekano, Bacha le Ntšetsopele ea Sechaba, Mohlomphehi Pitso Lesaoana o itse lekala la habo le na le mafapha a fapakaneng a tšireletso ea bana a kenyeletsang hara a mang Lefapha la Tšireletso ea Bana le la Thuso ea Sechaba e leng ona a fanang ka t’sireletso le tataiso molemong oa boiketlo ba bana.
A re Lekala le boetse le fana ka tlhokomelo ea bana ba hlokang ho holisoa le ho hokahanya mafapha ohle a sebetsanang le litaba tsa bana. A re Lehae la St. Cecilia ke le leng la mahae ao ba nang le selekane sa ho etsa mosebetsi oa ho holisa le ho hlokomela bana. A leboha Banka ea Standard Lesotho ka mosebetsi o motle oo eo e ntseng, ea ho fana ka mpho ena. A tiisa hore taba ena e bohlokoa haholo kaha banka e boetse e thusa bana hore ba tle ba tsebe ho itšoarela ka matsoho kaha likhoho tsena li tlil’o hlokomeloa ke bona.
Lebitsong la Standard Lesotho Bank, Mookameli Lefapheng la Lipoloko tsa Motho ka mong, Monghali Teboho Sello o boletse hore e ‘ngoe ea boikarabello ba bona ke ho bona hore ba khutlisetsa sechabeng le ho bona hore Basotho ba tsoelapele le ho ikutloa monate oa hore Lesotho ke lehae la habo bona. A re ba boetse ba nka e le boikarabello ba bona ho bona hore Basotho ba atleha bophelong ba bona ba letsatsi ka leng. “Ha re banka feela e isang lit’sebeletso sechabeng, empa re boetse re lokela ho bona hore naha ena ea habo rona le Basotho ba atleha.” Ke eena eo
‘Musi oa Setereke sa Berea, Monghali Phafane Maketa o thoholelitse le ho leboha Lehae la St. Cecilia ka tšebetso ea lona e ntle ea ho baballa le ho sireletsa bophelo ba bana. A re ke setšabelo le tšepo ea bona ha ho le thata Berea hobane ke lona le jereng setereke. A leboha banka ka mosebetsi oa eona o tsoileng matsoho.
Mohlokomeli oa Lehae la St. Cecilia Fr. Augustinus Mahlaku o lebohile ka tsela e khethehileng banka ka tšehetso eo ba faneng ka eona ea likhoho tsa mahe. A re tšehetso e kholo eo a e hlokang ke ea ho thusoa hore lehae le tsebe ho itlhahisetsa lijo ka mokhoa oa temo. A tiisa hore sena se tla thusa hore le tsebe ho phela nako e telele le sa hloke lijo.
