Moeletsi oa Basotho Beke ea 33 har’a selemo
Labotšelela
Ho baloa Bukeng ea Tšenolo. (11,4-12)
“Ba ahileng lefatšeng ba bolaea baprofeta bona ba babeli.”
‘Na Joannes ka bolelloa sena: Lipaki tsa ka tse peli ke tsena. Tsena ke Mehloare e ‘meli le Mabone a mabeli a leng kapel’a Morena oa lefatše. Ha motho a ka leka ho li etsa hampe, mollo o tsoang melomong ea tsona o tla metsa lira tsa tsona. Mang kapa mang ea lekang ho li etsa hampe o tla bolaoa joalo.
Li na le matla a ho koala leholimo, hore pula e se ke ea na matsatsing a boprofeta ba tsona: ‘me li na le matla a ho fetola metsi mali, le a ho otla lefatše ka likotlo tse ngata-ngata, kamoo li ratang kateng.
Etlare hoba li qete bopaki ba tsona, sebata se nyolohang mokoting o tebileng se tla li futuhela, se li hlole ‘me se li bolaee. Litopo tsa tsona li tla rapalla mapatlelong a motse o moholo, o bitsoang Sodoma le Egepeta ka ho tšoantša, moo le morena oa tsona a thakhisitsoeng teng.
Batho ba mefuta eohle, ba merabe, ba lipuo, le ba lichaba tse fapakaneng ba tla bona litopo tsa tsona ka matsatsi a mararo le karolo ea bobeli ea letsatsi, ‘me ba ke ke ba lumela hore li epeloe mabitleng. Ba ahileng lefatšeng ba tla thaba ka lefu ła batho bao ba babeli; ba tla nyakalla, ba be ba isetsane limpho, hobane baprofeta bao ba babeli ba ne ba tšoenya ba ahileng lefatšeng.
Empa kamora’ matsatsi a mararo le karolo ea bobeli ea letsatsi, moea oa bophelo o tsoang ho Molimo oa kena ho baprofeta bao: ba ema ka maoto ‘me tšabo e kholo ea oela ba ba boneng. Baprofeta ba utloa lentsoe le phefa le tsoang leholimong, le reng ho bona: Nyolohelang koano. ‘Me ba nyolohela leholimong ka leru, lira tsa bona li ntse li ba bona.
PESALEMA 143
HO BOKOE MORENA, EO E LENG LEFIKA LA KA.
Ho bokoe Morena, eo e leng lefika la ka,
ea koetliselitseng matsoho a ka ntoa
le menoana ea ka ho loana.
Ke eena mohauheli le qhobosheane ea ka,
lerako le nkhaheletsang le molopolli oa ka,
ke eena thebe ea ka eo ke itšireletsang ka eona,
ea behang lichaba tlasa ka.
Molimo oa ka ke tla u binela sefela se secha,
ke tla u roka ka harepa e khoele li leshome,
uena ea nehang likhosi ho hlola.
uena ea pholosang mohlanka oa hau Davida.
Ho baloa Evangeling e halalelang e ngotsoeng ke Luka. (20,27-40)
“Molimo ha se oa ba shoeleng, empa ke oa ba phelang.”
Ka nako eo, ha tla ho Jesu ba bang ba Basadukke ba latolang tsoho ea bafu, ba ‘motsa, ba re: Moruti Moshe o re ngoletse molao o reng: Ha ngoan’abo motho e mong a e-shoa a siea mosali, empa a se na bana, ngoan’abo mofu a nyale mosali eo ‘me a tsosetse ngoan’abo leloko.
Joale, ho ne ho le teng bara ba motho ba supileng. Oa pele a nyala mosali ‘me a shoa a se na bana. Ea mo hlahlamang a nka mosali eo: ‘me le eena a shoa a se na ngoana; kamorao le oa boraro a etsa joalo, ‘me ha e-ba ioalo ho bona ba supileng: kaofela ba e-shoa ba se na bana. Kamor’a bohle le eena mosali a shoa joale, mohla tsoho ea bafu e tla ba mosali oa ofe ho bona, ha e le moo e n’e le mosali oạ banna ba supileng?
Jesu a re ho bona: Bana ba lefatše lena ba nyala ‘me ba nyaloa; empa ba tla fumanoa e le ba tšoanelang lefatše le tlang le tsoho ea bafu, ba ke ke ba nyala leha e le ho nyaloa. Le hona ke bana ba Molimo, kaha ba e-na le kabelo tsohong. Ha e le hore bafu ba tla tsoha Moshe le eena a le bontša joalo litabeng tsa sehlahla se tukang, ha a re Morena ke Molimo oa Abrahama, le Molimo oa Isaaka, le Molimo oa Jakobo. Joale Molimo ha se oa ba shoeleng, empa ke oa ba phelang; efela bohle ba phelela eena.
Eaba ba bang ba bangoli ba araba, ba re: Moruti, u buile hantle. ‘Me ha ba ka ba hlola ba e-ba le sebete sa ho ‘motsa taba leha e le ‘ngoe.
