Moeletsi oa Basotho Sehopotso sa Cecilia ea Halalelang, Movirigo le Moshoela-Tumelo
Labohlano
Ho baloa Bukeng ea Sefela sa Lifela. (8,6-7)
“Lerato le matla se ka lefu.”
Mpehe joaloka letšoao pelong ea hau, joaloka letšoao sephakeng sa hau, hobane lerato le matla se ka Lefu, poulelo e sehloho se ka Qalo-ea-bafu; malakabe a lona a ka malakabe a mollo, ke khabo e tšabehang.
Metsi a mangata a ke ke a tima lerato, esitana le linoka li ke ke tsa le qoelisa. Ha eba motho a n’a ka fana ka maruo ‘ohle a hae ho fumana lerato, o n’a tla boelloa ke nyeliso feela.
PESALEMA 44 (11-12.14-17. R. 11)
MONYALI KE EO A FIHLA! TSOANG LE EO KHAHLAMETSA KRISTE MORENA.
Mamela ka hloko, morali, u sekehe tsebe,
lebala sechaba sa heno le ntlo ea ntat’ao
Khosi e tla khahloa ke botle ba hau;
ere ka ha e le Morena oa hau,
itihele fatše ka pele ho eena.
Morali oa khosi o tla a tlotlehile,
a apere tse khabisitsoeng ka gauda;
o isoa ho Khosi a apere tse mebala-bala.
A felehelitsoe ke baroetsana, balekane ba hae.
Ba isoang ka thabo le nyakallo,
ho ea kena tlung ea borena.
Bara ba hau ba tla nka sebaka sa bo-ntat’ao
u tla ba beha mahosana lefatšeng lohle.
Ho baloa Evangeling e halalelang e ngotsoeng ke Luka (10,38-42)
“Maretha a mo amohela ka tlung ea hae.”
Ka nako eo, Jesu a kena motsaneng o mong. Mosali ea bitsoang Maretha a mo amohela ka tlung ea hae. O n’a e-na le ngoan’abo ea bitsoang Maria, ea neng a lutse maotong a Morena, a mametse lentsoe la hae.
Ha e le Maretha, o n’a tšoarehile haholo ke ho ba sebeletsa. A ba a tla a re: Morena, ha u re letho ha ngoan’eso a ntlohetse ke le sebeletsa ke le mong na? Ak’u ‘molelle a nthuse!
Empa Morena a araba, a re ho eena: Maretha, Maretha, ua ipelaetsa le ho ikhathatsa ka tse ngata-ngata; athe ho hlokahala ntho e le ‘ngoe feela. Maria o ikhethetse kabelo e ntle, eo a ke keng a e amohuoa.
