Moeletsi oa Basotho Beke ea 31 har’a selemo
Labone
Ho baloa Lengolong la Moapostola Paulosi ho Ba-Filipi. (3,3-8)
“Tseo ke neng ke li shebile e le leruo, ke se ke li nka e le tahlehelo, ka baka la Kriste.”
Bana beso! Ke rona ba leng ba lebollo la ‘nete, rona ba hlomphang Molimo ka tšebeletso ea moea, ‘me ba ithorisang ka Kriste Jesu. Ha re behe tšepo ea rona meetlong ea botho. Ke ne nka beha tšepo tabeng tse joalo. Ha eba ho na le e mong ea hopolang hore o na le mabaka a ho beha tšepo meetlong ea botho, ‘na ke na le mabaka a maholo ho feta. Ke bololitsoe ka letsatsi la borobeli, ke Moisraele ka tsoalo, oa leloko la Benjamine, Moheberu mor’a Baheberu.
Ha ho buoa ka ho boloka Molao, ke ne ke le Mofarisi. Ke ne ke e-na le chesehelo e kholo, hoo ke ileng ka hlorisa Kereke ea Molimo. Ha ho buoa ka ho loka ho tsoang Molaong, ke ne ke le ea se nang nyatseho. Empa tseo ke neng ke li shebile e le leruo ke se ke li nka e le tahlehelo, ka baka la Kriste.
Ho feta moo ke nka tsohle e le tahlehelo, ka baka la hobane li fetoa ka bohlokoa ke tsebo ea Kriste Jesu, Morena oa ka.
PESALEMA 104
LIPELO TSA BA BATLANG MORENA, A LI KE LI THABE.
Binelang Morena, le mo roke,
le inahane ka tsohle tse tsotehang tsa hae.
Ithoriseng ka lebitso le halalelang la hae,
lipelo tsa ba batlang Morena li ke li thabe.
Batlang Morena le matla a hae.
thahasellang sefahleho sa hae ho se khaotso.
Se lebaleng tse tsotehang tseo a li entseng
limakatso tsa hae le ikahlolo
tse tsoang molomong oa hae.
Lona, lesika la Abrahama, mohlanka oa hae,
lona bana ba Jakobo, mokhethuoa oa hae.
Ke eena Morena, Molimo oa rona,
likahlolo tsa hae li aparela lefatše.
Ho baloa Evangeling e halalelang e ngotsoeng ke Luka. (15,1-10)
“Thabo e tla ba teng leholimong ka moetsalibe a le mong ea bakang.”
Ka nako eo, bakhafisi bohle le baetsalibe ba ne ba e-tla ho Jesu ho mo mamela. Bafarisi le bangoli ba ne ba koma-koma; ba re: Enoa o amohela baetsalibe, ‘me o ja le bona. Eaba o ba bolella papiso ena, a re:
Motho ke ofe oa lona ea nang le linku tse lekholo, eo e ka reng ha a lahlehetsoe ke e ‘ngoe ea tsona, a ke keng a siea tse mashome a robong a metso e robong feelleng, ‘me a ea batla e lahlehileng, ho fihlela a ba a e fumana na? ‘Me ha a s’a e fumane, a e jara mahetleng a thabile; ‘me ha a fihla ha hae, a phuthe metsoalle le baahisani, a re ho bona: Nthabiseng, hobane ke fumane nku ea ka e neng e lahlehile.
Ke re ho lona: le ka mokhoa o joalo, thabo e tla ba teng leholimong ka moetsalibe a le mong ea bakang, ho feta e bang teng ka ba lokileng ba mashome a robong a metso e robong ba sa hlokeng ho baka.
