Moeletsi oa Basotho Beke ea 28 har’a selemo
Labotšelela
Ho baloa Lengolong la Moapostola Paulosi ho Ba-Efese. (1,15-23)
“Kriste o entsoe hloho ea Kereke eohle, e leng ‘mele oa hae.”
Bana beso! Ha ke ntse ke utloa tumelo ea lona ho Morena Jesu le lerato la lona ho bahalaleli bohle, ha ke phetse ho le lebohela le ho le hopola lithapelong tsa ka.
Molimo oa Morena oa rona Jesu Kriste, Ntat’a letlotlo, a ke a le nehe moea oa bohlale le oa kutloisiso ea tse senotsoeng le tle le mo tsebisise. A khantšetse mahlo a moea oa lona, le tle le tsebe na ke e joang tšepo eo le e bilelitsoeng, ke a joang maruo a letlotlo la lefa la hae ho bahalaleli, ‘me ke bo bokakang boholo ba matla a hae ka ho rona ba lumetseng.
Ke eona tšebetso ea matla a maholo, a hae, eo a sebelitseg ka eona ho Kriste ha a mo tsosa bafung le ha a ‘meha bophahamong bo lekanang le ba hae leholimong ka holimo ho Lihloho le ho Balalaleli, ho Matla le ho Baokameli, le ho lebitso lefe kapa lefe le ka bitsoang, e seng lefatšeng lena feela, empa le ho le tlang.
O behile tsohle ka tlasa maoto a hae, ‘me o mo entse hloho ea kereke eohle, e leng ‘mele oa hae, o mo fang phetheho, eena ea phethahatasang tsohle.
PESALEMA 8
U BEHILE MORA UA HAU MORENA OA MESEBETSI EA MATSOHO A HAU.
Morena, Molimo oa rona,
le babatseha hakaakang
lebitso la hao lefatšeng lohle!
Botlotlehí ba hau bo phahametseng
esitana le maholimo
bo rorisoa ka melomo ea bana le ea masea.
Ha ke sheba maholimo a hau,
mosebetsi oa menoana ea hau,
khoeli le linaleli tseo u li bopileng,
ke ipotsa, ke re: Ana motho etsoe e le eng,
hore u b’u mo hopole?
Hona ngoan’a motho ke’ng, hore u mo nkele hlohong?
Leha ho le joalo, u mo etse
ea ka tlaasana ho manyeloi,
u mo roesitse mofapahloho oa letlotlo le tlhompho.
U mo entse mnorena oa mesebetsi ea matsoho a hao
u behile tsohle tlaša maoto a hae.
Ho baloa Evangeling e halalelang e ngotsoeng ke Luka. (12,8-12)
“Moea o Halalelang o tla le ruta ka nako eona eo seo le tsoanetseng ho se bolela.”
Ka nako eo, Jesu a re ho barutuoa ba hae! Kea le bolella, mang le mang ea tla mpaka pel’a batho, Mor’a motho le eena o tla mo paka pel’a manyeloi a Molimo. Empa ea tla ntatola pontšeng ea batho o tla latoloa pontšeng ea manyeloi a Molimo. ‘Me mang le mang ea tla bua se loantšang Mor’a motho o tla tšoareloa; empa ea tla nyefola Moea o Halalelang a ke ke a tšoareloa.
Mohla le qosoang matlung a thapelo le ho babusi le ho marena, le se ke la itoutisa ka hore na le tla araba joang kapa eng, kapa seo le tla se bolela; hobane Moea o Halalelang o tla le ruta ka nako eona eo seo le tšoanetseng ho se bolela.
