Moeletsi oa Basotho Beke ea 29 Har’a selemo
Laboraro
Ho baloa Lengolong la Moapostola Paulosi ho Ba-Efese (3,2-12)
“Sephiri se senotsoeng ke hore, ho Kriste Jesu balichaba le bona ke majalefa Pallong ea Molimo.”
Bana beso! Mohlomong le se le utloile kamoo Molimo a nkabetseng lineho tsa hae kateng, hore ke tsebe ho le fa tsona, le kamoo a ntšenoletseng sephiri seo kateng, kamoo ke ngotseng kateng hakhutšoanyane ka holimo, ‘me ha le bala, le ka lemoha kutloisiso eo ke nang le eona ea misteri ea Kriste.
Melokong e fetileng, sephiri seo ha sea ka sa tsejoa ke bana ba batho joaloka ha Moea o se senoletse ho baapostola ba halalelang le baprofeta mehleng ena. Sephiri sena ke hore, ho Kriste Jesu, ka evangeli balichaba ke majalefa hammoho le Bajodi, ke litho tsa ‘mele o le mong, ‘me ba na le kabelo hammoho le bona Pallong ea Molimo.
‘Na, leha ke le e monyenyane har’a bahalaleli bohle ke abetsoe mosebetsi ona o khethehileng, oa ho bolella balichaba menono e ke keng ea lekanngoa ea Kriste, le ho bontša ka mokhoa o totobetseng kamoo morero oa sephiri sa hae o ileng oa phethahatsoa kateng.
Sephiri sena ha e sa le se patehile ka ho Molimo,’ Mopi oa tsohle, e le hore joale, ka Kereke, Lihloho le Balaleli ba maholimong ba tsebisoe bohlale ba Molimo ka mefuta ea bona. Hona e bile ho ea ka morero oa bosafeleng, oo Molimo a o phethileng ho Kriste Jesu, Morena oa rona. Ke ka eena le ka tumelo ho eena, re nang le sebete sa ho atamela ho Molimo ka tšepo.
PESALEMA
LE TLA IKHELLA METSI KA THABO LILIBENG TSA PHOLOHO.
Ke eo Molimo ea mpholosang,
ke na le tšepo, ha ke sa tšaba;
hobane matla le thoko ea ka ke Morena,
ke eena pholoho ea ka.
Le tla ikhella metsi ka thabo
lilibeng tsa pholoho.
Bokang Morena, rapelang lebitso la hae,
le tumise liketso tsa hae lichabeng,
le li hopotse hore lebitso la hae
le phahame haholo.
Rokang Morena ka lifela hobane o entse tse kholo,
li ke li tsejoe lefatšeng lohle.
Hooang ka thabo, le etse litlatse,
lona baahi ba Sione,
hobane Ea halalelang oa Israele
o har’a lona ka botlotlehi ba hae.
Ho baloa Evangeling e halalelang e ngotsoeng ke Luka. (12,39-48)
“Mang le mang ea filoeng haholo, ho tla batloa haholo ho eena.”
Ka nako eo, Jesu a re ho barutuoa ba hae: Le mpe le utloisise hore, ha eba mong’a ntlo a ne a ka tseba nako eo lesholu le ka tlang ka eona, o n’a ke ke a lumella hore ntlo ea hae e ghaqhoe. Le lona le hle le itokisetse, hobane Mor’a motho o tla tla ka nako eo le sa e lebellang.
[Peterosi a re ho Jesu: Morena, papiso eo u e bolella rona kapa bohle na? Morena a araba, a re: Ke mang molisa ea tšepahalang ‘me ea seli, eo morena a ‘mehileng holim’a ba ntlo ea hae, hore a ba fe tekanyo ea koro ka nako e tšoanelang? Ho lehlohonolo mohlanka eo, etlare ha mong’a hae a fihla, a mo fumane a etsa joalo. Ruri kea le bolella, o tla ‘meha moalosi oa lintho tsohle tsa hae.
Empa ha mohlanka eo a ka re ka pelong ea hae: Mong’a ka o lieha ho fihla, ‘me a qala ho otla bahlanka le makhabunyane, le ho ja le ho noa le ho tahoa, joale mong’a mohlanka eo o tla khutla ka letsatsi leo mohlanka a sa mo lebellang ka lona, le ka nako eo a sa e tsebeng,’me o tla mo khaohanya le ba bang, a be le kabelo le ba hlokileng botšepehi.
Mohlanka eo ea tsebileng thato ea mong’a hae, empa a sa ka a mo lokisetsa ‘me a sa ka a etsa ka thato ea hae, o tla otloa lithupa tse ngata. Athe ea etsang tse tšoanelang kotlo, a sa tsebe, o tla otloa lithupa tse seng kae. Mang le mang ea filoeng haholo, ho tla batloa haholo eena; ‘me ea filoeng ho alosa tse ngata o tla botsoa haholo.]
