Moeletsi oa Basotho Beke ea 9 har’a selemo
Labotšelela
Ho baloa Lengolong la Bobeli la Moapostola Paulosi ho Timothi. (4,1-8)
“U phethe mosebetsi oa ho ruta Evangeli. Nako ea ho falla ha ka e se e fihlile, le ho putsoa ka mofapahloho oa toka ke Morena.”
Moratuoa! Ke u laea pel’a Molimo le pel’a Jesu Kriste ea tlang ho ahlola ba phelang le ba shoeleng, ka ho tla ha hae le ka ‘muso oa hae: ruta lentsoe; phehella, motho a rata kapa a sa rate: nyatsa, khalema ‘me u khothatse ka boiphapanyo bo boholo, u nts’u ruta kamehla.
Hobane ea tla nako, eo ka eona, ba sa tl’o mamella thuto ea ‘nete, empa ka baka la ho hlohlona ha litsebe tsa bona, ba tla ipokellela baruti ba lumellanang le litakatso tsa bona: ba tla khelosa litsebe tsa bona ‘neteng, e be ba retelehela litšomong. Empa ha e le uena, falimeha. Etsa mesebetsi eohle, u phethe mosebetsi oa ho ruta Evangeli, ‘me u phethisise tšebeletso ea hao. U be seli. Ha e le ‘na, ke se ke le lekhatheng la ho etsoa sehlabelo, ‘me nako ea ho falla ha ka e se e fihlile. Ke loanne senna, ke mathile ho fihlela qetellong, ke bolokile tumelo. Ho seng ho ntšaletse ke mofapahloho oa toka, oo Morena, moahloli ea lokileng, a tla mputsa ka oona letsatsing leo: e seng ‘na feela, empa le bohle ba lakatsang ho tla ha hae.
PESALEMA 70 (8-9.14-15.16-17.22. R. 15)
MOLOMO OA KA O TLA BOLELA PHOLOHO EA HAO.
Molomo oa ka o tletse thoriso ea hao,
le tlotliso ea hao letsatsi lohle,
U se ke ua ntahla ha ke tsofala,
ha ke se ke haelloa ke matla u se ke ua mphuralla.
Ha e le ‘na, ke tla ‘ne ke phele ka tšepo,
ke ‘ne ke tsoele pele ho u rorisa.
Molomo oa ka o tla bolela ho loka ha hao,
le pholoho ea hao letsatsi lohle.
Joale ke pheta liketso tsa bonatla ba hao,
ke ikhopotsa ho loka hoo e leng ha hao u inotsi.
Molimo oa ka, u nthutile ho tloha bocheng ba ka,
ke phatlalalitse mesebetsi e tsotehang ea hao
ho fihlela kajeno.
Hape ke tla u boka ka harepa,
ka baka la botšepehi ba hao, Molimo oa ka;
ke tla u roka ka lifela le ka cithara,
uena Ea-Halalelang oa Israele.
Ho baloa Evangeling e halalelang e ngotsoeng ke Mareka. (12,38-44)
“Mohlolohali enoa oa mofutsana o akhetse haholo ho feta bohle.”
Ka nako eo, Jesu, thutong ea hae, a bolella matšoele, a re: Tšabang bangoli ba ratang ho tsamaea ba hohobisa liaparo le ho lumelisoa mapatlelong, le ho lula litulong tse ka pele matlung a thapelo le meketeng ea lijo: ba jang ling tsa bahlolohali, ba ntse ba etsa sa mokana ba etsa lithapelo tse telele. Ba tla ahloloa ha boima.
Eaba Jesu o ea lula malebana le polokelo ea chelete ea Tempele, a shebeletse bongata, ha bo ntse bo akhela cheletana polokelong, ha barui ba bangata bona ba ne ba akhela e ngata. Ha fihla mosali e mong oa mohlolohali oa mofutsana: eena a akhela cheletana tse peli, tse ka lekanang sente.
Ke ha Jesu a bitsa barutuoa ba hae, a re ho bona: Kanete, ke re ho lona, mohlolohali enoa oa mofutsana o akhetse haholo ho feta bohle ba akhetseng polokelong ea chelete. Hobane bohle ba akhetse seo ba se nkileng bonkong, athe eena o akhetse seo a se nkileng bohloking ba hae, e leng sohle seo a bileng le sona, phetho ea seo a neng a ka iphelisa ka sona.
