Tšeliso Thakholi ‘Musi oa Setereke sa Butha-Buthe, Monghali Tšepa Chaba o butse ka molao thupelo ea matsatsi a mahlano ea Morero oa Phepelo ea Metsi Mabalane Mokhahlelo oa Boraro (LLWDSP III), eo sepheo sa eona e leng ho beha baetapele ba sechaba leseling ka khetho le tšebetso ea likomiti tse peli tse tlang ho thusa ho kopanyana sechaba le Morero le ho akofisa tšebetso ea oona.
H’a bula thupelo ena e tšoaretsoeng Moroeroe Lodge, Butha-Buthe ho tloha kala 20 ho isa la 24 Pulungoana, Monghali Chaba o boletse hore bona e le baetapele ba sechaba ka mekhahlelo e fapakaneng, ba amohela LLWDSP III ka liatla tse peli hore e qale tšebetso ea eona literekeng tsena tse peli. A re Morero ona hao se o qalile o tlilo fetola bophelo ba sechaba sa litereke tsena tse peli kaha sepheo se seholo ke hore ofe sechaba sa metsi a hloekileng ho bile ho kenyeletsoa le kholiso ea moruo.
“Re holisa moruo ka hore hona le batla fumana mesebetsi ea nakoana le ea nako e telele. Taba ena e tla re thusa hore ha Morero o feta Basotho ba bangata ba tlabe ba fumane mesebetsi ka mekhahlelo e fapakaneng.” O betse joalo a bile a phethela ka hlokomelisa sechaba hore boikarabello bo boholo bo ho sona, ba ho tšoarana ka matsoho le LLWDSP III ho atlehisa morero ona kaha e le sona se tlilo imona menoana ka phumantšo ea mesebetsi le phepelo ea metsi a hloekileng.
Mookameli oa LLWDSP, Mofumahali ‘Mamathe Makhaola o itse sepheo sa mantlha sa Morero ona ke ho bona hore sechaba sohle se phelang toropong ea Butha-Buthe le libaka tsa Leribe ba fumana metsi a hloekileng, bana le mokhoa oa bohloeki. A re Morero o tlilo kena tšebetsong ka likarolo tse tharo e leng phano ea metsi, bohloeki le ho bona hore Makhotla ohle a Puso ea Libaka ao Morero o leng kahare ho ona le mafapha ohle a ‘muso, ao e tla re ha Morero o se o phethetse tšebetso o tsamaile, a be a le boemong ba ho tlao tsamaisa.
A re Morero o tlilo ahela litsi tsohle tse kahare ho ona tse kenyeletsang hare tse ling likolo, litsi tsa bophelo le metebo ea sepolesa matloana a ka bang 750 le malapa a tlokotsing a ka bang 319. “E le hore Morero o tle o phethahale hantle kamora thupelo ena re tlilo khetha likomiti tse peli e bitsoang Komiti ea Kopanelo e bopiloeng ka litho tsa Makhotla a Puso ea Libaka le Komiti ea Litletlebo e bopiloeng ka boemeli ba sechaba,e leng eona e tlilo hokahanya Morero le sechaba.” A rialo. A qetella ka hore Morero ona hao se o phethetsoe ho tlilo sebelisoa chelete e kalo ka M2Billione, e le ea kalimo mekhatlong ea machaba le Bankeng e Kholo ea Ntšetsopele ea Afrika.
Setsibi sa Tikoloho le Likamano tsa Sechaba, Monghali Mosiuoa Mohlouoa eena o itse Morero ona o tlilo khakoloa Makhotleng a robeli a Puso ea Libaka. A re likomiti tse peli tse tlang ho khethoa, li tlilo sebetsana le sello sa sechaba se tlang ho angoa ke Morero. A tiisa hore sepheo sa tsona ke ho bopa likamano tse mofuthu lipakeng tsa Morero le sechaba. Morero oa LLWDSP III o ile oa khathokoa ka molao ka la 22 Phato ngoahola.
