Tšeliso Thakholi Tšebetso e kholo ea phutheho ea matsatsi a mararo a Komiti ea Tsamaiso ea IMBISA, e koetsoe ka molao ka Sehlabelo se Halalelang sa ‘Missa, o neng o tšoaretsoe Parishing ea Maria Mofumahali oa Lefatše, Mazenod ka la 21 Loetse monongoaha.
H’a fana ka khothatso ‘misseng ona, Mobishopo John Joale Tlhomola SCP o boletse hore Jesu o ile a bona monna ea bitsoang Matheus a lutse tlung ea lekhetho, ‘me a mo khetha ka leihlo la mohau ho ba e mong oa baapostola ba hae. A re o ile a mo khetha e seng ho mo sala morao feela, empa ka ho tlisa phetoho ho batho ba bangata. “Etsoe mang le mang ea latelang Kriste o tšoanela ho tsamaea joaloka eena. Ke Kereke, u Kereke re kereke e tsamaeang le Kriste.”
A supa hore joalokaha Morena a ile a bitsa Matheus ka lentsoe, sephiring o ile a mo ruta ho mo latela. Mobishopo Tlhomola a bontša hore boikoahlaeo ba e mong oa bakhafisi, e bile mohlala oa tšoarelo ho batho, ho baetsalibe le ho bakhafisi ba bangata. “Ke ka lebaka lena Jesu a itseng, ke tletse baetsalibe e seng ba lokileng, entsoe ngaka e batloa ke motho ea kulang.” A rialo.
A re Matheus eo e neng e le Moapostola oa Jesu, o ile a tlisa pholo ho baetsalibe ba bangata. “Kaha ho se motho ea iphelelang ka bo-eena empa a phelela batho ba bang.” A qetella ka ho ipiletsa ho bakriste ho se be lesisitheho ho sala Morena Jesu morao, joalokaha bohle re ronngoe ho ea phatlalatsa molaetsa o molemo ho ea ka lineo tsa rona tse fapakaneng.
Qetellong ea ‘missa,e mong oa baemeli ba bakriste ba Parish ea Maria Mofumahali oa Lefatše, Monghali Peter Tsoamotse o ile a etsa puo ea teboho ho balisa bao ba Kereke, ba boneng ho le bohlokoa hore ba koale phutheho ea bona, ka ho tla etsa ‘missa moo Mofumahali oa Lefatše.
H’a fana ka puo, Mobabatsehi Tlali Gerard Lerotholi OMI, o bontšitse hore Kereke e Lesotho e motlotlo ka hore e be phutheho ea Komiti ea Tsamaiso ea IMBISA, e tlilo tšoareloa Lesotho. A re naha ea Lesotho ke eona mothehi oa IMBISA hobane molao oa motheo o ahang IMBISA, o ne o thakholoe Lesotho mona. A re leha e le mona khotso le thabo li tletse ka lipelong tsa rona, ka lebaka la boteng ba baeti bana ba bohlokoa, tikoloho ea Afrika e lokela hore e be le khotso, empa ka ho khetholoha khotso ena e lokela hore e qale Lesotho mona. “Morena Molimo ea matla ohle a boloke Lesotho, a boloke IMBISA.” Ke Mobabatsehi eo.
President ea Komiti ea Tsamaiso ea IMBISA, Mobabatsehi, Liborius Ndumbukuti Nashenda OMI o qalile ka ho isa liteboho tse khethehileng ho bohle ba kentseng letsoho katlehisong ea litšebeletso tsena. A re joalokaha bohle re tseba, thomo ea mantlha ea Rabalumeli ke hore bohle re lokela ho tsamaea ‘moho ka moea oa lerato le bonngoe. A bontša hore joalokaha re le Kereke, re tšoanela ho bitsana e le hore re tsebe ho tsamaea ‘moho re le ntho e le ‘ngoe.
A thetha ka hore bona e le babishopo ba Afrika, takatso le taba-tabelo ea bona ke hore bohle re tšoarane ka matsoho, re tsamae ‘moho re le Afrika eohle.
Ke babishopo ba 11 ba bileng teng phuthehong ena, ‘me liboka tse bileng teng le boemeli ba tsona ke sa Namibia, Angola, Mozambique, Afrika Boroa, Zimbabwe, Sao Tome, Eswatini le Lesotho e le lona le amohetseng baeti.
Ho sa le joalo IMBISA ka fane ka tlaleho ea kopano ea eona, ipalle litaba mona Statement on the 78th IMBISA Standing Committee Meeting – Imbisa –
