Nthabeleng Seitlheko Mokhatlo oa Bochaba le lipapali, o etsa khoelehetso ea tsosoloso ea lipapali tsa bochaba le metjeko kahare ho naha ele karolo ea ho ts’oaea khoeli ea bochaba le bohahlauli. Tsena li boletsoe ke President ea Mokhatlo, Thabang Maoela ‘mokeng oa bo-ralitaba oa la 15 Loetse monongoaha.
O re ba rata ho bona Basotho ba keteka khoeli ea bochaba ka liponts’o tsa bochaba, mekete ea bochaba le lipapali kahare ho metse le meketeng ea malapa. A re malapeng ho etsetsoe bana lits’omo le lithothokiso ba hopotsoe seo Basotho ba leng sona, hobane ba na le tsela tse fapakaneng le lichaba tse ling tsa kholiso ea bana.
Maoela o re Basotho ba lokela ho hopotsana bochaba ba bona hoba ke letlotlo le leholo, ‘me e le mokhatlo ba lakatsa ho tsamaisana le batho bohle ba ratang litaba tsa bochaba hobane ke ntho e kholo e lokelang ho baballoa ke bohle.
A re ba tla sheba libaka tsa lihloliloeng joaloka Thaba Bosiu hobane ke karolo ea bohlokoa ntlafalong ea moruo, ‘me ke takatso ea bona hore mekete ea bochaba e khutle haholo e neng e hlahisa talenta ea ngoana oa Mosotho ba etse sekoele.
O ile a kopa hore baqapi ba tsohe molota ba qape lipina tse ncha ele karolo ea boitokisetso ba ho keteka lilemo tse 200 sechaba sa Basotho se thehiloe, hobane ka sehlopha sa bona ba entse qeto ea ho tsoa lets’olo ho rekisa mokete oa lilemo tse 200 sechaba sa Basotho se thehiloe.
A ipiletsa ho ‘muso ho phahamisa maoto tlhophisetsong ea mokete oa lilemo tse 200 sechaba sa Basotho se thehiloe.
Tichere ea litaba tsa bochaba Lesotho, Tsie Phats’oa o itse bochaba likolong bo felisitsoe ke tlhokahalo ea litsebo, bofuma bo tjametseng likolo kaha litlhophiso li hloka chelete, ‘me likolo tse ntseng li ts’oere bochaba ke tsa mathomo ha tse phahamrng ho se na letho, lipapali le bochaba li hlakotsoe.
A re sena ke hobane ‘muso ha oa kenya letsoho ntlafalong ea likolo litabeng tsa bochaba, hoo li tichere li qetellang li ikotla lipakotho ho ngolisetsa mokhatlo ka lebaka la talenta eo li e bonang ho baithuti.
Moorosi Moshoeshoe, Mothehi oa Mokhatlo oa Lenaka la Mohlomi, o itse ba eme khahlanong le ts’enyeho ea boleng ba bona ‘me ba laba-labela ho khutlisa lits’ia tse ba entseng batho kaha Basotho e se mofuta o senyehileng. A re ba rata ho khutlisa seriti sa Basotho ka ho ruta nalane, kaha ba tlameha ho tsebahala ka mekhoa ba khalemele bobe kahare ho bona ho qoba ho se arohane.
A re bona ba Lenaka la Mohlomi ba tla kenya letsoho mesebetsing eohle e amanang le litaba tsa bochaba hoba karolo ea ho hlasimolla Basotho hore ba itsebe.
O re e le ho ts’oaea lilemo tse 200 ‘muso o ekeletse makala ohle khakanyo ea lichelete lekala le le leng le fuoe 1% hore ebe chelete e tla sebelisoa litabeng tsa bochaba ebile ele monyetla oa ho hlasimolla bohahlauli .
