Nthabeleng Seitlheko Maoblata a Maria a emetsoeng a se na Sekoli, a phatlalalitse ka molao setereke sa Paul Chicoine moo e seng e tl’o ba lelapa la bona, St. Gerard Tikolohong ea Mohale’s Hoek, ka la 14 Loetse monongoaha.
Khothatsong ea hae Fr. Maboee Patrick Matsau OMI, o itse mokete oa Tlotliso ea Sefapano o re mokriste a se ke a lebala liketso tsa Morena, Mohau oa Molimo le mpho ea topollo eo Morena a re fileng eona. O re mokete ona ha o re sie masoabing a Labohlano le Halalelang, empa bakriste ha ba sheba sefapano ba be le lebaka la ho thaba, la ho ithorisa le ho ikotla sefuba ka seo Morena a ba etselitseng sona hobane sefapano sena seo e neng e le ho tlontlolla moetsi oa bophelo, empa o entse hore ka sona re fumane tlhompho, tlotla le tlholo.
A re ka sefapano sa hae re pholositsoe, re ts’oaretsoe libe, re fumane mohau, re fumane pholoso, botebo, khotso le poelano, ‘me ha re phahamisa mahlo re sheba sefapanong re re “rea u adora Morena hobane u lopolotse lefats’e ka sefapano sa hau,” ‘me ka sona kereke e re romela ho inchafatsa kamehla hore e mong le e mong a hopole liketso tsa Morena.
Mookameli oa Kopano ea Maoblata Fr. Mothusi Sydney Boatile OMI, o itse likopano tsa baitlami li nka karolo kholisong ea kereke le sechaba hore bohle re tle re be le pholoho ea bophelo, lintlafatso le ntlafatso ea kereke le ho aha borapeli.
A leboha Mobishopo John Joale Tlhomola SCP ka ho ba amohela kahare ho tikoloho, ‘me bonngoe boo maoblata ba bo bonts’ang ka mehla ke matla ho bona, moo matla a bona a patehileng teng ke boikopanyo ba bona. A re o leboha le Maoblata ohle a sebelitseng ‘mishoneng oa St. Gerard hore Molimo a ne a ba matlafatse kaha ba ba etselitse metheo e matla, le bohle ba ntseng ba tsoelapele ho ba ts’ehetsa ka lithapelo mesebetsing ena ea bona.
Mobishopo oa Tikoloho ea Mohale’s Hoek, John Joale Tlhomola SCP, o kopile bohle ho its’etleha ka melao e ba tsamaisang, ka hoo ba tla bona mesebetsi, ntlafalo, thuto le bophelo ba se moea le libaka tseo ba phelang ho tsona.
Mookameli e mocha oa setereke sa Paul Chicoine, Fr. Raymond Matete Leuta OMI, o itse o leboha mosebetsi ona empa bohle ba tsebe hore o tla etsa mosebetsi ona ka thuso ea bona hoba ha le mong a ke ke a atleha.
Ho ea ka nalane, Mishone oa St. Gerard o ne o thehoe ka selemo sa 1938, moo ea reheletsoeng ka setereke sena Fr. Paul Chicoine OMI, a neng a sebetsa teng ho tloha ka 1951-1956, a theha sekolo sa Masentle, letlole la lithuso tsa baithuti.
Fr. Leuta OMI o khethiloe e le mookameli oa setereke sa Paul Chicoine nako ea lilemo tse tharo, a tlatsoa ke Fr. Emmanuel Lekhera OMI, Fr Clement Motlaopa OMI le Br. Tiisetso Maphala OMI eo e tla ba Ramatlotlo.
