Tšeliso Thakholi E mong oa baiketi likhethong tsa Puso ea Libaka, Monghali Retšelisitsoe Goodman o re bakhethoa ba bacha ba tlang ho kena liofising tsa makhotla a puso ea libaka kamora likhetho tse tlilo tšoaroa, ka la 29 Loetse monongoaha, ba lokela ho utloisisa hore mosebetsi oa bona oa mantlha ke ho tseba litlhoko tsa sechaba makhotleng a litikoloho ao ba tlilo a sebeletsa.
Tsena o li buile puisanong le ba Moeletsi oa Basotho ka la 12 Loetse 2023, moo a bontšitseng hore ha litho li tseba litlhoko tsa sechaba, li lokela ho etsa ka litsela tsohle ho bona hore li roala lieta li ea hohle moo li ka tsebang ho thusoa teng, molemong oa ho tlisa ntlafatso kahare libaka tseo ba phelang ho tsona. “Ba se ke ba iphumana ba qhanolotso, ba phuthile matsoho ba ntse ba lla ka hore ‘muso ha o e-s’o theolele matla ho makhotla a puso ea libaka. Athe moo e bang o se o qalile o se o batalalitse mabala.” A rialo.
Goodman o re moketa ho tsosoa o itekang, ‘me ha litho li leka ka nqena le ka nqane ho batlela sechaba sa habo tsona lithuso, lintho li tla iketsahalla habonolo, “re ntse re sa lle ka ‘muso.” O re ha hon a ho ba le seboko sena sa phohomela se etsoang ke sechaba, sa hore litho tsa makhotla a puso ea libaka li khethiloe empa li lutse feela ha ho letho leo le li etsang, li itjella chelete ea sona sechaba mahala, ho se lintlafatsa tsa letho kahara libaka tsa bona.
“Nete e ‘ngoe ke ea hore ba bang ba litho tsa makhotla a puso ea libaka, ha ba qeta ho khethoa ba kena ka liofising, e hlile ha ho na letho leo ba le etsang. Ba iphomolela ‘me o fumane ho se na tlhahiso ea mesebetsi kapa tsona lintlafatso ho hang.” O re taba eo e utloisa sechaba bohloko hore mokhethoa oa puso ea libaka, h’a khethiloe h’a etsetse sechaba molemo oa letho empa a khethiloe ka tšepo ea hore o tlilo tlisa liphetoho bophelong ba sechaba sa makhotla a tikoloho a habo.
A re ha motho a khethiloe ke sechaba se bile se e-na le tšepo ho eena ea ho tlisa liphetoho, ho tlameha hore ho ke hobe le ntho eo sechaba se ka ikotlang sefuba ka eona kapa sa e supa e molemong oa sechaba sohle. “Sechaba se supe menyabuketso ea lona kamora likhetho tsena, etsoe ke lona ba lokelang ho ntlafatsa bophelo ba sechaba sa Basotho.” Ke Goodman eo.
