Moeletsi oa Basotho Beke 14 har’a selemo
‘Mantaha
Ho baloa Bukeng ea Moprofeta Hosea. (2:14.15-16.19-20)
“Ke tla inyalla uena ho isa khale.” Ke sena seo Morena Molimo a se bolelang: Ke tla isa Israele feelleng, ke bue tse mo hlatsoang pelo. Moo a tla nkaraba joaloka ha a sa le mocha, joaloka mohla a tsoang lefatšeng la Egepeta.
Ke tla inyalla uena ho isa khale. Ke inyalle uena ka tšoanelo le ka toka, ka lerato le ka mohau. Ke inyalle uena ka botšepehi, hore u tle u tsebe Morena.
PESALEMA 144
MORENA MOHAU, O MOSA.
Ke tla u boka ka matsatsi ‘ohle,
ke rorise lebitso la hao ka mehla le mehla.
Morena o moholo, o lokeloa ke thoriso eohle,
boholo ba hae bo sitoa ho lekanngoa.
MORENA MOHAU, O MOSA.
Moloko o thoholetse moloko o tlang, mesebetsi ea hao,
o tumise liketso tsa matla a hao.
Ke tla inahana ka khanya ea botlotlehi ba hao
le ka liketso tse tsotehang tsa hao.
MORENA MOHAU, O MOSA.
Morena o mohau, o mosa,
o lieha ho halefa, o mehauhelo e mengata.
Morena o molemo ho bohle,
o hauhela mesebetsi eohle ea hae.
MORENA MOHAU, O MOSA.
Ho baloa Evangeling e halalelang e ngotsoeng ke Matheus (9:18-26)
“Morali oa ka o geta ho hlokahala, leha ho le joalo, tloho, ‘me o tla phela.”
Ka nako eo, ha Jesu a nts’a bua, ha be ho e-tla morenana e mong, a mo khumamela, a re: Morali oa ka o qeta ho hlokahala: leha ho le joalo, tloho, u ‘mehe letsoho, ‘me o tla phela. Jesu a ema, a mo sala morao le barutuoa ba hae.
Eaba mosali e mong, eo e neng e se e le lilemo tse leshome le metso e ‘meli, a tšoenngoa ke phallo ea mali, o tlil’o pota kamorao ho Jesu, o ama qola ea kobo ea hae; hobane o ne a re ka pelong: Ha nka mpa ka ama kobo ea hae, ke tla fola. Jesu a reteleha, ‘me ha a ‘mona, a re: U khothahale, morali, tumelo ea hao e u pholositse. Mosali eo a fola ho tloha motsotsong oona oo.
Ha Jesu a fihla ha morenana, ‘me a bona baletsi ba makolilo le letšoele le tlatsang lerata, a re: Suthang, hobane ngoanana ha a shoa, o mpa a robetse. Bohle ba mo tlepa litšeho. Eare ha letšoele le ntšelitsoe kantle, Jesu a kena, a tšoara ngoanana ka letsoho, ‘me a re ho eena ema. Botumo ba taba eo ba anela naha eo kaofela.
