Moeletsi oa Basotho MOKETE OA GABRIEL LE RAFAEL BA HALALELANG, BAAREKANYELOI.
Labobeli
Ho baloa Bukeng ea Tšenolo. (12:7-12)
“Mikaele le mangeloi a hae a futuhela drakone.”
Ntoa e kholo ea qhoma leholimong: Mikaele le mangeloi a hae a futuhela drakone, Drakone le mangeloi a eona ea loana; empa ea hloloa, ‘me ea tebeloa leholimong ea lieloa lefatšeng, le mangeloi a eona a liheloa le eona. ‘Me ka utloa leholimong lentšoe le phefa le buang, le re: Joale tlholo, le matla, le borena ke tsa Molimo oa rona, le puso ke ea Kriste oa hae, hobane moqosi, oa bana babo rona o lihetsoe, ea neng a ba qosa nyene le bosiu pel’a Molimo oa rona.
Le bona ba mo hlotse ka mali a Konyana, le ka ‘nete eo ba e pakileng. Ha ba ka ba qenehela bophelo ba bona, empa ba inehela lefu. Ithabeleng ke hona, lona maholimo, le lona ba ahileng ho ‘ona.
Pesalema 137
MORENA, KE U ROKA KA LIFELA PEL’A MANYELOI.
Morena, ke u boka ka pelo ea ka eohle,
ke u roka ka lifela pel’a manyeloi.
Ke itihela fatše ka pel’a tempele e halalelang ea hao,
‘me ke boka lebitso la hao,
ka baka la mohau oa hao le ‘nete ea hao;
MORENA, KE U ROKA KA LIFELA PEL’A MANGELOI.
Hobane o phahamiselitse lebitso la hao,
ka hoim’a tsohle.
U n’u nkarabe ha ke hoeletsa ho uena,
ua fa pelo ea ka matla a macha.
MORENA, KE U ROKA KA LIFELA PEL’A MANGELOI.
Likhosi tsohle tsa lefatše li tla u boka, Morena.
ha li utloa lipolelo tsa molomo oa hao.
Li tla roka litsela tsa Morena, li re:
“Letlotlo la Morena le leholo.”
Ho baloa Evangeling e halalelang e ngotšoeng ke Joannes. (1:47-51)
“Le tla bona mangeloi a Molimo a theoha leholimong a oka-okela Mor’a motho.”
Jesu a bona Nathanael a e-tla ho eena, eaba o bua ka eena, o re: A le ke le boneng Mo-Israele ea se nang mano. Nathanael a re ho Jesu: U ntsebella kae? Jesu a mo fetola, a re: Pele Filipi a u hoeletsa u le tlas’a
sefate sa feiga, ke ne se ke u bone. Nathanael a mo fetola, a re: Morena, u Mor’a Molimo, u Morena oa lsraele. Jesu a araba, a re: hobane ke itse ke u bone tlas’a sefate sa feiga ua lumela: u sa ntse u tla bona tse kholo.
Eaba o re ho eena: Amen, amen, ke re ho lona, le tla bona leholimo le butsoe ‘me manyeloi a Molimo a theoha ho lona a oka-okela Mor’a motho.
