Nthabeleng Seitlheko Redeemed Christian Church of God (RCCG) Africa Missions Global e tsetetse chelete e ka bang M1.6Millione ntlafatsong ea Children of Glory Christian School Mafeteng, ka sepheo sa ho ntlafatsa tikoloho eo bana ba ithutang ho eona.
Sekolo sena se theiloeng ka 2003, hajoale se na le baithuti ba 107, ba theohileng ho tloha ho 400. Ka tšehetso ea RCCG Africa Missions Global, ho se ho entsoe lintlafatso tse kenyeletsang tokiso ea matloana le meaho ea thuto, e leng se thusang ho theha tikoloho e hloekileng e loketseng ho ithuta.
Sehlopha sa RCCG Africa Missions Global se etetse sekolo ka la 27 Phato monongoaha ho lekola tsoelo-pele ea mosebetsi, le ho iponela liphetoho tse seng li entsoe ka tšehetso ea sona.
Ketelo ena e ne e boetse e reretsoe ho utloisisa liqholotso tse ntseng li tobane le sekolo, litlhoko tsa sona le menyetla ea ho tsoela pele ho matlafatsa thuto le ntšetsopele ea bana.
Moruti Mojela Mafike o itse sepheo sa morero ona ke ho kenya letsoho kholong le ntlafatsong ea thuto, ha likereke le mekhatlo ea bolumeli li phethahatsa karolo ea tsona sechabeng. O itse tšehetso ena e shebane le ho arabela litlhoko tse teng metseng, haholo-holo ho matlafatsa bana ka tsebo le boiphihlelo bo tla ba thusa ho itokisetsa bokamoso.
“Re ikemiselitse ho sebetsa le likolo le sechaba ho aparela le naha hore ngoana e mong le e mong a be le monyetla oa ho fumana thuto ea boleng, ho sa natsoe hore na o tsoa tikolohong efe,” ho boletse Mafike.
Mafike o boetse o totobalitse bohlokoa ba maraang-rang thutong, a re RCCG Africa Missions Global e na le merero ea ho koetlisa litichere tse ka bang 1000 mabapi le thuto le tšebeliso ea mahlale a morao-rao AI.
Ho ea ka eena, mohato ona o reretsoe ho thusa litichere ho sebelisa mahlale a macha ho ntlafatsa tsela eo bana ba ithutang ka eona le ho atolosa menyetla ea thuto.
Nakong ea ketelo, sehlopha sa RCCG se ile sa hlahloba litšebeletso le meaho ea sekolo, sa boela sa buisana le ba amehang ka tsoelo-pele e seng e fihletsoe, liqholotso tse ntseng li le teng le litlhoko tsa sekolo bakeng sa bokamoso.
Moruti Bisi Oshikoya o itse tšehetso ea RCCG Africa Missions Global e reretsoe ho kenya letsoho ntlafatsong ea thuto ea bokriste, ntšetsopele ea bacha le ntlafatso ea sechaba. O itse ho tsetela thutong ha se feela taba ea ho haha kapa ho lokisa meaho, empa ke ho aha bokamoso ba bana le ho ba fa lisebelisoa tseo ba li hlokang hore ba fihlela bokamoso ba bona.
Mookameli oa Children of Glory Christian School, Ntahli Pasane, o itse tšehetso eo sekolo se e fumaneng e se e qalile ho bonahala bophelong ba letsatsi le letsatsi ba baithuti. O itse bana hona joale ba khona ho sebelisa matloana a hloekileng le ho ithuta tikolohong e ntlafetseng, e leng se thusang ho theha maemo a matle a ho ithuta.
“Sekolo sa rona se ipabola haholo lithutong tsa mahlale le lipalo, empa re ntse re tobane le liqholotso tse ling tse amang baithuti. ‘Me tšehetso e kang ena e re fa tšepo ea hore re ka tsoela pele ho ntlafatsa maemo a thuto,” ho boletse Pasane. Tšehetso ena e totobatsa karolo eo mekhatlo ea bolumeli e ka e bapalang ho tšehetsa thuto le ntšetsopele ea bana le bacha.
Bakeng sa Children of Glory Christian School, letsete la RCCG Africa Missions Global ha le bonahale feela mehahong le litšebeletsong, empa le thusa ho theha tikoloho eo bana ba ka ithutang ho eona ka polokeho, bohloeki le seriti.
RCCG Africa Missions Global e bontšitse boikemisetso ba ho tsoela pele ho latela tsoelo-pele ea sekolo, ho utloisisa litlhoko tsa sona le ho lekola menyetla e meng ea ntšetsopele nakong e tlang.
