Moeletsi oa Basotho La 24 Phato 2026
Beke ea 21 har’a selemo
‘Mantaha
Ho baloa Bukeng ea Tsenolo. (21:9-14)
“Tloo, ke u bontše monyauoa, mohats’a Konyana.”
Lengeloi la re ho ‘na: Tloo, ke u bontše monyaluoa, mohats’a Konyana, ‘me lengeloi la nkisa ka moea thabeng e kholo, e telele, ‘me la mpontša motse o halalelang, Jerusalema, o theohang leholimong, ho Molimo. O n’o khanya ka letlõtlo la Molimo, ‘me o n’o benya joaloka lejoe la bohlokoa, lejoe la jaspe le joaloka Kristale.
O n’o e-na le lerako le leholo, le phahameng le nang le menyako e leshome le metso e ‘meli, e lebetsoeng ke mangeloi a leshome le metso e ‘meli. Menyakong eo ho ne ho ngotsoe mabitso a meloko e leshome le metso e ‘meli ea bana ba Israele.
Ka nq’a Bochabela menyako e n’e le meraro, ka ng’a Leboea e le meraro. ka nq’a Boroa e le meraro le ka nq’a Bophirima e le meraro. Lerako la motse le ne le e-na le metheho e leshome le metso e ‘meli, eo ho eona ho ngotsoeng mabitso a baapostola ba leshome le metso e ‘meli ba Konyana.
PESALEMA 144
METSOALLE EA HAO MORENA E TSEBISOE LETLOTLO LA PUSO EA HAO.
Morena, mesebetsi ea hao kaofela e ke-e u lebohe,
metsoalle ea hao e ke e u boke.
E kę e phatlalatse tlotla ea puso ea hao,
e ke e bolele matla a hao.
METSOALLE EA HAO MORENA E TSEBISOE LETLOTLO LA PUSO EA HAO.
Ho tsebisa bana ba batho matla a hao,
letlõtlo le botumo ba puso ea hao.
Morena o tšepahala lipolelong tsohle tsa hae,
o mohau liketsong tsohle tsa hae.
METSOALLE EA HAO MORENA E TSEBISOE LETLOTLO LA PUSO EA HAO.
Morena o lokile itseleng tsohle tsa hae,
o mohau mesebetsing eohle ea hae.
Morena o haufi le ba hoeletseng ho eena,
bohle ba hoeletsang ho eena e le ka ‘nete.
METSOALLE EA HAO MORENA E TSEBISOE LETLOTLO LA PUSO EA HAO.
Ho baloa Evangeling e halalelange ngotsoeng ke Joannes. (1:43-51)
“U Mor’a Molimo, Morena oa lsraele.”
Ka nako eo, Jesu a rata ho ea Galilea, a teana le Filipi ‘me a re ho eena: Ntatele. Filipi e ne e le oa Bethsaida motse oa habo Andreas le Peterosi. Filipi a teana le Nathanael, ‘me a re ho eena: Re fumane eo ho ngoliloeng ka eena ke Moshe Molaong le ke Baprofeta. Ke Jesu, mor’a Josefa oa Nazaretha. Nathanael a re ho eena: Hleka ntho e molemo e ka hla ea tsoa Nazaretha.
Filipi a re ho eena: Tloo, u bone.
Jesu a bona Nathanael a e-tla ho eena, eaba o bua ka eena, o re: A le ke le boneng Mo-Israele ea se nang mano. Nathanael a re ho Jesu: U tsebella kae? Jesu a mo fetola, a re: Pele Filipi a u hoeletsa u le tlas’a sefate sa feiga, ke ne se ke u bone. Nathanael a mo fetola, a re: Morena, u Mor’a Molimo, u Morena oa Israele. Jesu a araba, a re: hobane ke itse ke u bone tlas’a sefate sa feiga ua lumela: u sa ntse u tla bona tse kholo. Eaba o re ho eena: Amen, amen, ke re ho lona, le tla bona leholimo le butsoe ‘me mangeloi Molimo a theoha ho lona a oka-okela Mor’a motho.
