Moeletsi oa Basotho Sehopotso sa Lefu la Joannes Mohlatsoi ea Halalelang.
Beke ea 21 har’a selemo
Labohlano
Ho baloa Bukeng ea Moprofeta Jeremia. (1:17-19)
“U ba bolelle tsohle tseo ke tla u laela tsona. U se ke ua ba tsaba.”
Matsatsing ao, lentsoe la Morena la mphihlela, la re: u itlame letheka, u eme, u ba bolelle tsohle tseo ke tla u laela tsona. U se ke ua ba tšaba, esere le ‘na ka u kenya tšabo mahlong a bona. Bona, kajeno ke u behile u le joaloka motse o sireletsehileng, tšiea ea tšepe le lerako la koporo, u tl’u hanyetse naha ena kaofela: likhosi tsa Juda le mahosana a eona, baprista ba eona le sechaba sa eona. Ba tla u loantša, empa ba tla sitoa ho u hlola, hobane ke na le uena ho u namolela, ho rialo Morena.
Pesalema 70
MOLOMO OA KA O TLA BOLELA PHOLOHO EA HAU.
Ke tšabela ho uena, Morena,
ke se ke mpe ka tlontlolleha le ka mohla.
Ka ho ea ka toka ea hau,
u ‘namolele ‘me u ntokolle,
ntšekehele tsebe ‘me u mpholose.
MOLOMO OA KA O TLA BOLELA PHOLOHO EA HAU.
U be lefika leo ke itšireletsang ka lona,
qhobosheane eo ke tla pholoha ho eona;
efela ke uena lefika la ka le qhobosheane ea ka;
Molimo oa ka, ak’u ‘ntše liatleng tsa ea khopo.
MOLOMO OA KA O TLA BOLELA PHOLOHO EA HAU.
Morena, ke uena tšepo ea ka,
Molimo, u bile setšehetso sa ka ho tloha bocheng ba ka.
Ke itšetlehile ka uena ho tloha tlhahong ea ka,
u bile mosireletsi oa ka ho tloha popelong ea ‘m’e.
MOLOMO OA KA O TLA BOLELA PHOLOHO EA HAU.
Molomo oa ka o tla bolela ho loka ha hau,
le pholoho ea hau letsatsi lohle.
Molimo oa ka, u nthutile ho tloha bocheng ba ka,
ke phatlalalitse mesebetsi e tsotehang ea hau
ho fihlela kajeno.
MOLOMO OA KA O TLA BOLELA PHOLOHO EA HAU.
Ho baloa Evangeling e halalelang e ngotsoeng ke Mareka. (6:17-29)
“Ke rata hore hona joale u mphe ka mokeke hloho ea Joannes Mohlatsoi.”
Heroda o ne a ile a romela batho ho ea tšoara Joannes, a mo kenya chankaneng ka baka la Herodiase eo Heroda a neng a mo nyetse, leha e ne e le mohats’a Filipi ngoan’abo. Efela Joannes o n’a re ho Heroda: Ha ho lumellehe hore u nke mosali oa ngoan’eno.
Ha e le Herodiase, eena o n’a hloile Joannes haholo, a batla ho ‘molaea, a mpa a sitoa, hobane Heroda o n’a mo tšaba, ka ho tseba hore ke motho ea lokileng, ea halalelang, ‘me o n’a mo sireletsa. Hoba a mo utloe, o n’a tsieleha haholo; le ha ho le joalo, o n’a mo mamela a se na lekhonono.
Empa monyetla oa hlaha, ka letsatsi la khopotso ea tsoalo ea Heroda. A etsetsa mahosana le balaoli ba hae le batho ba baholo ba Galilea mokete oa lijo. Eare hoba morali oa Herodiase a kene, a etsa chao, ‘me a khahlisa Heroda le ba neng ba le lijong le eena.
Eaba morena o re ho moroetsana: Nkope seo u se ratang, ke tla u fa sona. A ba a mo hlapanyetsa, a re: Sohle seo u tla se kopa, ke tla u fa sona, leha e ka ba karolo ea bobeli ea ‘muso oa ka.
Moroetsana a tsoa, a fihla, a botsa ‘m’ae, a re: Ke tla kopa’ng na? Eo a re: Hloho ea Joannes Mohlatsoi. Hang a potlakela ho boela ho morena, a kopa, a re: Ke rata hore hona joale u mphe ka mokeke hloho ea Joannes Mohlatsoi.
Morena a soaba haholo, empa ka baka la boikano ba hae, le ka baka la ba neng ba le lijong le eena o n’a sa batle ho mo hanela. Hang a roma e mong oa balebeli, a mo laela hore a tlise hloho ea Joannes Mohlatsoi.
Molebeli a ea, a fihla a mo khaola hloho ka chankaneng; a nt’o tlisa hloho ea hae ka mokeke, a e nehela ngoanana, ‘me ngoanana a e nehela ‘m’ae.
Eitse ha barutuoa ba Joannes ba utloa hoo, ba tla ho nka setopo sa hae, ‘me ba se boloka lebitleng.
