Tšeliso Thakholi Kamor’a ho ba motšoareli lilemo tse telele, lelapa la Leuta le hlahisitse le ho nehelana ka Morena Sanaha Tumane Leuta, e le eena morena e mocha oa Mauteng, tšebeletsong e bileng hona Mauteng tikolohong ea Matsieng ka la 28 Tlhakubele 2025.
H’a bua lebitsong la marena, Morena Toma Molaoli o ipilelitse ho morena e mocha ho mamela likeletso tsa sechaba, ho ikokobeletsa sona le ho ba le katamelo e mofuthu ho sona, etsoe morena ke morena ka sechaba. A re o lokela ho hlompha sechaba se behiloeng boliseng ba hae, e le hore le sona se tle se tsebe ho mo hlompha. “Qoba ho sebetsa le masholu le litlokotsebe e le hore u tle u tsebe ho busa sechaba sena ka khotso. Re batla Mauteng e ‘ne e sale e na le khotso.” A rialo
Ka ho le leng, Molula-Setulo oa Lekhotla la Puso ea Libaka la Mauteng, Monghali Motebang Setona o itse ba ikutloa ba tletsoe ke thabo e khaphatsehang kaha sechaba sa Mauteng se sotlehile nako e telele, ka lebaka la ho hloka litšebeletso haholo-holo tse kang tsa setempe. “Ka lebaka la ho hloka setempe re ne re hula ka boima kaha re ne ba tempeloa libakeng tse ling tse ka thoko, ‘me ha se lintho tsohle tse ka tempuoang ka thoko. E leng hore litšebeletso li ne li eme mona ho se na letho le tsoelang pele.” O boletse joalo a bile a phethela ka ho itebohela le ho lebohela sechaba ka morena e mocha, ‘me a re o na le tšepo e tiileng ea hore ba tlil’o sebetsa ka mofuthu.
H’a amohela borena, Morena Sanaha Tumane Leuta o lebohile lelapa ka ho mo tšepela hore a ka etella pele sechaba ho latela litholoana tse ntle tsa mosebetsi oa hae tseo a seng a li entse nakong eo e ntseng e le motšoareli. A re morero oa hae o moholo ke ho tla sebetsa ka thata hore sechaba sa Mauteng se fumane motlakase hoba bophelo ba hajoale ke motlakase. A tiisa hore o tlil’o boela a sebetsa ka thata ho bona hore sechaba se ileng sa baleha ka lebaka la lintoa tsa nako e fetileng se khutlela hae ho tla phela le ho phelisana ka khotso. A qetella ka hore tse ling tsa lintlafatso o tlil’o li etsa ka mokhoa oa lipapali.
