Vinkmag ad

RSL e nanabetsa letsoho

Setsi sa Lesotho sa Litšebeletso tsa Lekhetho(RSL) se nehelane ka ntlo ea bohloeki ho Sesole sa Lesotho, e nang le liphaposi tsa ho hlapela le matloana a boithuso a banna le basali, e tlang ho sebelisoa nakong ea lipapali. Tšebeletso ena e bile Boema-fofane ba Sesole sa Lesotho ba Mejametalana, Maseru ka la 25 Tlhakubele 2025.

H’a nehelana ka mpho ena, puong ea hae eo a ileng a e teka kapel’a Bolaoli ba Sesole sa Lesotho ‘moho le baphatlalatsi ba litaba ba neng ba phuthehile ka bongata bo boholo, Komishinara ea RSL Mofumahali ‘Mathabo Mokoko o boletse hore leano la bona la tšebetso le tšoana hantle le neheletsano ea lesokoana, e totobatsang matla a tšebelisano ‘moho e le ho fihlela katleho.

A re ka ho fetisetsana lesokoana e mong le e mong o bapala karolo ea bohlokoa ka kopanelo, sena se tiisa hore kopano ke matla molemong oa katleho le kholo ea sechaba. A re phano ena ea ntlo ke mohato oa bohlokoa oa boikopanyo le ho khothaletsa bophelo bo botle ba bosebeletsi ba litsi tsena tse peli ‘moho le sechaba ka kakaretso.

A ipiletsa ho bahoebi le batho bohle ba boithatelo bo botle ho tla sebetsa ‘moho molemong oa ho tšehetsa merero ea mofuta ona kaha e sa fane ka bophelo bo botle ho sesole feela, empa e le molemong oa sechaba ka kakaretso. A tiisa hore mamati a butsoe ho tla sebetsa ‘moho bakeng sa ho bopa sechaba se phetseng hantle. A re joalokaha mpho ena e tlil’o sebelisoa nakong ea lipapali, sena se tla thusa bacha ho tloha linthong tse ka senyang bophelo ba bona, ‘me ba itahlela ka setotsoana lipapaling bakeng sa bokamoso ba bona bo phethehileng.

H’a amohela mpho ena ea bohlokoa, Molaoli oa Sesole sa Lesotho, Leut. Gen. Mojalefa Letsoela o qalile pele ka ho isa liteboho tsa hae tse khethehileng ho botsamaisi bohle ba RSL ka mpho ena e kana-kana. A re kamehla litho tsa tšireletso li khothaletsoa ho boloka bohloeki ka linako tsohle, ka hona sena se tlilo boela se matlafatsa taba ea bohloeki haholo. A itlama hore sesole se tla lisa le ho hlokomela hore e lula e le maemong a matle ka linako tsohle e le hore e tle e tsebe ho phela nako e telele.

Vinkmag ad

Read Previous

Ha ho tjaka tlhoka koli

Read Next

La 29 Tlhakubele 2025

Leave a Reply

Your email address will not be published. Required fields are marked *

Most Popular