Moeletsi oa Basotho Beke ea 8 har’a selemo
‘Mantaha
Ho baloa Bukeng ea Siraka. (17:20-28)
“Sokolohela ho Morena, u lahle sebe.”
Molimo o lumella ba bakang ho khutlela ho eena, o khothatsa ba nyahameng pelo. Sokolohela ho Morena, u lahle sebe; rapela kapel’a sefahleho sa hae ‘me u fokotse molato. Khutlela ho Ea holimo-limo, u furalle bobe, seo a se nyonyang u se hloee ruri. Qalong-ea-bafu ke mang ea ka rorisang Ea holimo-limo, ha esita le ba phelang ba sa mo tlotlise? Ho tlotlisa ho khaotsa ha motho a e-shoa, ‘me a se a le sieo; ea ka rorisang Morena ke ea phelang, ea bophelong bo botle. O moholo hakakang mohau oa Morena, tšoarelo ea hae ho ba khutlelang ho eena!
PESALEMA 31
ITHABELENG HO MORENA, LONA BA LOKILENG, ‘ME LE NYAKALLE.
Ho lehlohonolo eo sebe sa hae se tšoaretsoeng
eo phoso ea hae e hlakotsoeng.
Ho lehlohonolo motho
eo Morena a sa ‘meheng molato,
eo ho seng mano moeeng oa hae.
Ke ile ka u bolella sebe sa ka,
ka se ke ka u patela molato oa ka.
Ka re: Ke tla ipolela phoso ea ka ho Morena;
‘me uena u ntšoaretse molato oa sebe sa ka.
Ha feela e mong le e mong oa metsoalle ea hau
a ka u rapela nakong ea mathata,
moroallo oa metsi o ke ke oa mo fihlela.
Ke uena setšabelo sa ka, u mphemisa matšoenyeho,
u etsa hore ke teeloe hare ka litlatse tsa pholoho.
Ho baloa Evangeling e halalelang e ngotsoeng ke Mareka. (10:17-27)
“U e’o rekisa tsohle tseo u nang le tsona, u ntan’o tla, u ntatele.”
Ka nako eo, ha Jesu a kena tseleng, motho e mong a tla a matha, a otla ka lengole ka pele ho eena, a ‘motsa, a re: Moruti ea molemo, ke tla etsa joang hore ke tle ke rue bophelo bo sa feleng na?
Jesu a re ho eena: U mpitsa ea molemo ka baka la’ng? Ha ho ea molemo, ha e se Molimo a inotši. U tseba melao: U se ke ua bolaea, u se ke ua feba, u se ke ua utsoa, u se ke ua fana ka bopaki ba bohata, u se ke ua senyetsa ba bang, hlonepha ntat’ao le ‘m’ao.
Eo a mo araba, a re: Moruti, tsena tsohle ke li bolokile ho tloha bocheng ba ka. Jesu a mo talima, a mo rata ‘me a re ho eena: U sa haelloa ke ntho e le ‘ngoe feela: tsamaea, u e’o rekisa tsohle tseo u nang le tsona, u fane ho mafutsana, ‘me u tla ba le leruo leholimong: u ntan’o tla, u ntatele.
Empa eo a khathala matla ke polelo eo, a ba a tsamaea a soabile, hobane o n’a e-na le maruo a mangata. Jesu a ea bohle ka mahlo, eaba o re ho barutuoa ba hae: Barui ba tla kena ‘musong oa Molimo ka thata hakakang!
Barutuoa ba ne ba hloletsoe ke lipolelo tsena.
Empa Jesu a boela a ba bolella, a re: Bana ba ka ho thata hakakang ho kena ‘musong oa Molimo! Ho bile ho bonolo ho kamele ho feta ka lesoba la nale, ho e-na le hore morui a kene ‘musong oa Molimo.
Bona ba makala le ho feta, ba bolellana ba re: Joale ke mang ea ka pholohang? Eaba Jesu oa ba sheba, o re: Ena ke taba e sitang batho, empa e seng Molimo, hobane ha ho letho le sitang Molimo.
