Moeletsi oa Basotho Beke ea 25 har’a selemo
Sehopotso sa Pius oa Pietrelcina, Moprista
‘Mantaha
Ho baloa Bukeng ea Maele. (3,27-34)
“Morena o nyonya bolotsana bohle.”
Ngoan’a ka, se hane ho etsetsa ea nang le tokelo molemo, ha eba e le ntho e matleng a hao. Se re ho mohaeno: Tsamaea, u tl’u boele u khutle, ke tla u fa hosasa: athe u s’u nts’u e-na le ntho eo. Se rerele mohaeno bobe, ha a ntse a lulisane le uena a u tšepile. Se tsekisane le motho ntle le lebaka, a sa u etsa hampe. Se thahaselle ho etsisa mohlekefetsi, se ikhethele leha e le ‘ngoe ea litsela tsa hae.
Hobane Morena o nyonya molotsana, empa o na le setsoalle le ba pelo li ntle. Thohako ea Morena e holim’a ntlo ea ea khopo, empa o hlohonolofatsa lehae la ba lokileng. O soma basomi, ba eisehang o ba bontša mohau.
PESALEMA 14 (2-5. R. 1)
EA LOKILENG O TLA AHA THABENG E HALALELANG EA HAO, MORENA.
Morena, ke mang ea ka kenang tlung ea hao,
ke mang ea ka ahang thabeng e halalelang ea hao?
Ke ea sa nyatseheng metsamaong ea hae,
ea etsang tse lokileng,
ea buang ‘nete e tsoang pelong ea hae,
Eo leleme la hae le sa etselletseng,
ea sa etseng oa habo hampe,
ea sa nyefoleng ngoan’abo.
Mahlong a hae ea khopo oa nyeliseha,
empa batho ba tšabang Morena b’a hlompheha.
Ha a alimane ka chelete a lebeletse phaello,
ha a amohele tjotjo ho tsoa ho ea se nang molato.
Ea etsang tsena
a ke ke a oa le khale.
Ho baloa Evangelinge halalelang e ngotsoeng ke Luka. (8,16-18)
“Lebone le hlongoa sehlomelong hore ba kenang ba tle ba bone leseli.”
Ka nako eo, Jesu a re ho matšoele: Ha ho motho eo e reng ha a hotelitse lebone a le kubute ka pitsa, kapa a le behe ka tlas’a bethe, empa o le hloma sehlomelong hore ba kenang ba tle ba bone leseli. Hobane ha ho ntho e patiloeng e ke keng ea pepesoa, ‘me ha ho ntho e ka sephiring e ke keng ea tsejoa ‘me e ke keng ea pepesaha.
Ka baka leo, hlokomelang kamoo le utloang kateng, hobane ea seng a e-na le letho o tla fuoa, ‘me ea se nang letho o tla amohuoa le seo a hopolang hore o na le sona.
