Moeletsi oa Basotho Bophelo ‘meleng; Motho e mong le e mong o phela nameng, ‘me khaho ea ‘mele ha boikhethelo ba motho ka mong. Ke ka lebaka lena batho ba shebahala ba sa ts’oane; lilemo, seemo, lebala, boima, joalo-joalo. Leha ‘mele ea batho e fapakana ka chebahalo joalo, litlhoko tsa eona tsona lia ts’oana. Batho ba bang ba na le ho nyelisa ba bang ka tsela eo ba shebahalang ka eona, empa ba sa lemohe hore le bona chebahalo ea ‘mele ea bona ke boemo bo ka fetohang neng le neng. Mang le mang ea phelang o monyetleng oa ho shebahala ka tsela e ‘ngoe e fapakaneng le ea kajeno. Setho ka seng sa ‘mele se na le mosebetsi oa sona.
‘Mele e hloka moea oa phefumoloho, o finyellang lithong tsohle tsa ‘mele ha ho nepahetse, oo bophelo ha bo tloaelehile o sa rekoeng. Oona ‘mele oo o hloka lijo, metsi a ho noa le ho hlapa, bolulo, litlolo le lisebelisoa tse ling. Lintho tsena tse hlokoang ke ‘mele lia sebeletsoa hore li fumanehe. Na u phathahantsoe ke bophelo ba ‘mele?
Bophelo kelellong: Kelello le eona ka ho ts’oana le ‘mele e hloka ho otloa, ho tloha motho a sa le monyenyane e matlafatsoa ka ho rutoa lintho butle-butle holatela nako ea hae. H’a ntse a hola o ea sekolong ka sona sepheo sa ho holisa Kelello ea hae, ka hona se bohlokoa kholisong ea kelello ea motho. Ke lebaka lena thuto e leng tokelo ea mantlha ea botho, eo motsoali e mong le e mong a tlangoang ke molao ho e phethahatsa baneng ba hae e le boikarabelo ba hae. Hape thuto ha e tsofalloe, batho ba ithuta ntho e ncha hore ba ‘ne ba matlafale kelellong. Ha motho a ntse a ithuta le boleng ba hae boa hola. Na u phathahantsoe ke bophelo ba kelello?
Bophelo moeeng: Motho e mong le e mong o na le bophelo moeeng, moea oa rona o phela kahare ho ‘mele ea rona. Moea le oona oa feptjoa tumelong, ke lebaka lena batho ba tla ea likerekeng, sepheo ke ho holisa tsebo litabeng tsa bona tsa semoea. Batho ka litumelo tsa bona tse fapakaneng ba itukisetsa ho ea fepa moea oa bona ka matsatsi a hloahiloeng hore ba be hammoho ho matlafatsa tumelo. Na u phathahantsoe ke bophelo ba moea?
Bophelo maikutlong: Batho bohle ba na le maikutlo, maikutlo ana a angoa ke lietsahala tsa letsatsi ka leng likamanong lipakeng tsa motho le motho kapa batho ba mo potapotileng. Ekaba malapeng, likolong, mesebetsing, likerekeng joalo-joalo. Maikutlo le oona a hlokomeloa, a matlafatsoe. Na u phathahantsoe ke bophelo ba maikutlo?
Motho h’a lokele ho phathahanngoa ke e le ‘ngoe ea tse boletsoeng kaholimo, bone ba tsona li etsa bophelo ba motho hore bo phethahale, bo otlolohe, ka hona bohle re lokela ho tsitsisa lintlha tsena bone ba tsona. Re li ele hloko hore re tsebe ho lemoha kapele ha bothata bo le teng, hore re se ‘na re oka nama empa ho kula maikutlo. ‘Me le bana litaba tsena li ba ama ka kotloloho joalo ka batho ba baholo. Le bona re lokela ho ba thusa ho itemoha le ho itlhokomela ba sa le lilemong tse tlaase.
Puseletso Moeti; Mother’s Touch
