Lioli e apareloa ke bofifi

Sehlopha sa Bolo ea Maoto sa Lioli leha se bonahetse se sebelitse hantle ka ho hapa papali ea sona ea liki, khahlanong le LCS mafelong a beke se ntse se aparetsoe ke bofifi kamor’a ho timela ha eo e neng e le Motlatsi oa President, Monghali Mothoalo Mothoalo, ea tlil’o phomotsoa borokong ba hae ba ho qetela ka Moqebelo oa la 18 Pulungoana monongoaha.

Mothoalo lefu la hae le tla libeke li se kae kamor’a ho bolokoa ha LeFA Honorary PRO, mofu Thabo Pule, o ne a ithukhubelitse ka matla sehlopheng sa habo le papaling ea bolo ea maoto ka kakaretso, kaha e bile setho sa Komiti ea Phethahatso (NEC) ea Mokhatlo o Tsamaisang Bolo Lesotho (LeFA), ho tloha ka selemo sa 2020 le ho ba President ea DiFA Berea ka lilemo tse ngata.

H’a fana ka matšeliso a hae ka tahlehelo ena e kholo lapeng la bolo ea maoto, President ea LeFA, Adv. Salemane Phafane KC o itse Mothoalo e bile motho oa bohlokoa haholo papaling ea bolo ea maoto, ea neng a bile a e-na le tšebelisano ‘moho e mofuthu molemong oa ho holisa le ho atlehisa bolo ea maoto. “Morena Molimo a ke a tšelise lelapa la hae le mahlomoleng ka lerato le leholo. A tšelise le lelapa la hae la bolo ea maoto le metsoalle eohle. Mothoalo o ne a tsoaletsoe  bolo ea maoto naheng ena.” A rialo.

Ba bang ba barati le batšehetsi ba bolo ea maoto, ba pakile makhabane a mangata haholo bophelong ba hae, haholo-holo lerato leo a neng  a e-na le lona papaling ea bolo ea maoto. Ba mo hlalosa e ne e le setho sa NEC, se neng se e-na le sohle se hlokoang ke LeFA le sehlopha sa habo. Ha ba bua ka boiphihlelo ba hae papaling ea bolo ea maoto, ba re e ne e le motho ea matla, ea bohlale, ‘me ea nang le litsebo tse khethehileng. Ka hona nakong ena eo sehlopha se bonahalang se sebetsa hantle, ba ne ba e-na le tšepo e kholo ea hore o tlil’o se tlisetsa katleho ka mekhoa e fapakaneng.

Ba isa matšeliso a khethehileng ho ba lelapa, batsehetsi ba Sehlopha sa Lioli le ho barati bohle ba papali ea bolo ea maoto ka tahlehelo ena.  Ho timela ha hae ho siile sekheo sa setonana lipelong tsa barati ba bolo, sehlopheng sa habo le ho LeFA.  O tla lula a hopoloa ka mehla. Moea oa hae o phomole ka khotso.