Moeletsi oa Basotho Beke ea 1 har’a selemo
Labobeli
Ho baloa Lengolong ho Ba-Heberu. (2:5-12)
Ho ne ho tšoaneleha hore mopholosi a phethehe ka ho utloisoa mahloko.
Molimo ha a ka a beha pusong ea manyeloi lefatše le tlang ho tla, leo re buang ka lona. Nqa e ‘ngoe, Mangolo a pakile, a re: Motho ke’ng hore u mo hopole, hona ngoan’a motho ke’ng hore u mo nkele hlokong? U ‘mehile tlasana ho manyeloi ka nakoana, u mo roesitse mofapahloho oa letlotlo le tlhompho. U mo entse morena oa mesebetsi ea matsoho a hau, u behile tsohle tlas’a maoto a hae.
Efela ha a behile tsohle tlas’a hae, ha ho letho leo a le siileng le se tlas’a hae. Empa ha e le joale, ha re e-s’o bone hore tsohle li behiloe tlas’a hae.
Athe Jesu ea kileng a ba tlasana ho manyeloi ka nakoana, re ‘mona joale a roesitsoe mofapahloho oa letlotlo le tlhompho, ka baka la lefu leo a shoeleng ka lona, hore ka thato ea Molimo a utloisoe lefu bakeng la bohle.
Efela ho ne ho tšoaneleha hore Molimo eo tsohle li etselitsoeng eena ‘me li entsoeng ke eena, ea ratileng ho fihlisa bana ba bangata khanyeng, a etse hore moetapele le mopholosi oa bona a phethehe, ka ho utloisoa mahloko.
Hobane mohalaletsi le bahalaletsuoa hammoho, ba Tsoa motsong o le mong. Ka baka leo Jesu ha a lihlong ho ba bitsa bana babo, a re: Ke tla bolella bana beso lebitso la hau, ke tla u rorisa har’a phutheho.
PESALEMA 8
U BEHILE MORA OA HAU MORENA OA MESEBETSI EA MATSOHO A HAU.
Morena, Molimo oa rona, le babatseha hakakang
lebitso la hao lefatšeng lohle!
Ke ipotsa, ke re: Ana motho etsoe e le eng,
hore u b’u mo hopole?
Hona ngoan’a motho ke’ng,
hore u mo nkele hlokong?
Leha ho le joalo,
u mo entse ea ka tlaasana ho manyeloi,
u mo roesitse mofapahloho oa letlotlo le tlhompho.
U mo entse Morena oa mesebetsi ea matsoho a hau,
u behile tsohle tlas’a maoto a hae:
Linku le likhomo, kaofela ha tsona,
hammoho le liphoofolo tsa naha,
linonyana tsa leholimo, le lihlapi tsa leoatle,
tsohle tse chalakang le maliba.
Ho baloa Evangeling e halalelang e ngotsoeng ke Mareka. (1:21-28)
“O n’a ba ruta joaloka ea nang le matla.”
Jesu a kena tlung ea thapelo, Kafarnauma, ka letsatsi la sabbatha ‘me a qala ho ruta batho. Ba ne ba tsota thuto ea hae, kahobane o n’a ba ruta joaloka ea nang le matla, e seng joaloka bangoli.
Tlung ena ea bona ea thapelo ho no ho le teng motho ea tšoenngoang ke moea o litšila, ea ileng a hooa, a re: U re batla’ng Jesu oa Nazaretha? Ana u tletse ho re timetsa? Kea tseba hore na u mang: u Ea halalelang oa Molimo. Jesu a mo khalemela, a re: Thola u b’u tsoe ho motho eo. ‘Me moea o litšila oa mo tsukutlaka, oa bokolla habohloko, eaba o tsoa ho eena.
Bohle ba makala, ba ba ba botsana, ba re: Hona ke’ng? Thuto ena e ncha ke e joang, e rutoang ke motho ea matla hakaale, ea bileng a laelang esita le meea e litšila ‘me e mo mamele? ‘Me kapele-pele botumo ba hae ba tlala naheng eohle ea Galilea.
