Nthabeleng Seitlheko Ea tšoereng molepo e le Mookameli oa Loti Brick Ramokoebu Lewaneka, o re kampani ea Hippo Transport e ile ea ikhula lebelong la ho reka kampani ea ‘muso ea setene, e kikitlelang licheleteng, hoo e sitoang ho reka thepa le ho lefa basebetsi. Tsena o li buile kapela Komiti ea Paramente a alositseng Tšebeliso ea Lichelete tsa Sechaba (PAC), ka la 19 Pulungoana monongoaha.
O re ho ikhula ha Hippo Transport tlholisanong ea theko ea Loti Brick ho ile ha susumetsa bookameli ba khoebo ena ho kopa tumello ea Lekhotla la Matona hore e tsoelepele ka lipuisano le Lephema Executive Pty. Ltd, ka sepheo sa ho hlahloba hore na e tla fihlela lipehelo tsa eona.
O re ho ile ha ntšoa lipapatso ho tloha ka selemo sa 2022, moo ho neng ho iketa Hippo Transport, Lephema Executive le banna ba Basotho ba neng ba e-šo ho ngolisi ka nako eo, ho fihlela e hira setsebi se ileng sa eletsa hore ho luloe majoana, ho hlahlojoe hore na bao ba tla fihlela lipehelo tsa ho tsamaisa khoebo eo.
Komiti e bile ea makalla Lewaneka ka ho phatlalatsa hore Hippo Transport, e ne e ipehetse ho reka Loti Brick ka M26Millione empa o sitoa ho beha poaneng chelete eo Lephema Executive e neng e re e ka e reka ka eona.
Litaba tsena, li tla kamor’a hore Loti Brick e koaloe ka lebaka la ho hloka lichelete, e se e sitoa ho reka thepa le ho lefa basebetsi, le ho fana ka thepa e neng e se e lefeletsoe ke bareki.
Mokhethoa oa Likotsi ka ho RFP, Itumeleng Rantšo, o ile a sisinya hore Koporasi ea Ntlafatso ea Moruo oa Lesotho (LNDC), e koaloe ka ho feletseng, kaha e senya lichelete tsa naha ena le ka meputso ea bohlanka ba eona bo sa phetheng thomo ea bona.
Rantšo ea tlatsitsoeng ke litho tsa komiti ea PAC paramenteng, o re Loti Brick e shoelletse matsohong a LNDC e sitoang ho laola litša le matlo a ‘muso, ‘me litho li bile tsa lumella ka popo ea setšoantšo sa molao se qhalang koporasi eo.
Komiti ena, e bile ea laela LNDC ho ea lefa basebetsi ba eona ba behelletsoeng ka thoko ho mosebetsi, le ho emisa hanyenyane ka boinahano ba ho kena lipuisanong tsa thekisetsano ea Loti Brick le kampani ea Lephema Executive.
