Nthabeleng Seitlheko Phala ea Sepolesa sa Lesotho (LMPS) Senior Sup. Mpiti Mopeli o hlalositse hore sepolesa ha se’a utsoa chelete ea Mokha oa Lipolotiki oa BEE ‘mokeng oa bo-ralitaba oa la 23 Mphalane monongoaha.
O itse ka khoeli ea ‘Mesa ngoahola bahatsa ba baetapele ba mekha ea BEE le BDC ‘Matlali Soro (45) le ‘Makopanang Mohatle (38) ‘moho le Mongoli-Kakaretso oa BEE Thetso Kabi (27) oa Khubetsoana ba ile bae a Ha Tikoe ho ea lefa baemeli ba mekha eo kamor’a likhetho. Eaba ho fihleng ha bona ba qabana le balefuoa kaha ba ne ba lebetse chelete e kaalo ka M300.00 empa bao ba ba ts’episa e kaalo ka M150.00. ka ho elelloa ho se khotsofale ha bona balefi b aba ts’episa eona eo ba neng ba e lebetse ‘me ba re ba tla ea Komising e Ikemetseng ea Likhetho (IEC) ho fumana tlhaloso.
A re kamor’a ho ba lefa chelete ba ile ba re bao ba tekene pampiring ‘me ho tloha moo ba leba mapoleseng ho ea tlaleha hore batho bao ba hlahang pampiring moo ba ba nketse chelete ka mahahapa.
“Ke moo sepolesa se ileng sa sala litaba tseo morao ho etsa liphuputso, ’me tsona tsa sibolla hore batho bao ha se ’nete ha ba ikhapela chelete empa tlaleho ea bona ke ea lefofo.” A rialo.
A re basali bao ba babeli le monna eo ba ile ba ts’oaroa ba qosoa ka tlaleho ea lefofo ka ho tlola Molao oa 74 oa 2010 ka ho tlaleha seo e seng sona. O itse ke ho tloha hona moo sepolesa se ileng sa tsoa letšolo la ho ea batla hore na chelete e ‘ngoe e hokae?
O re sepolesa se ile sa fumana chelete e kaalo ka M15,000.00 Ofising ea BDC le e kaholimo ho M90, 000.00 ha `Makopanang Maseru East. A re tlaleho e bontša hore chelete eo kaofela e ile ea khutlisetsoa IEC, kamor’a ho khothaletsa hore e khutlele teng ha sepolesa se ntse se etsa liphuputso.
“Banna ba babeli bao e leng baetapele ba mekha ea lipolotiki, ha ba utloa hore mapolesa a tšoere basali ba bona, ba ile ba ea sepoleseng empa ha ba hlokomela hore ba fasitsoe ka mahlaahlela ba tšola tlhako morong.” Ke Mopeli eo.
A re Sepolesa ha se na molato ho nyameleng ha chelete, ‘me se ntse se fuputsa taba e hlileng e etsahetseng ketsong ena, kaha moetapele oa BEE Mohatle a ntse a neta sepolesa ka leshano.
Litaba tsena li latela hore Moetapele oa BEE Litaba Mohatle, a nts’e phatlalatso ea litaba ka la 15 Mphalane monongoaha, moo a neng a kopa thuso ho baphatlalatsi ho phatlalaletsa sechaba haholo batho bao e neng e le baemeli ba mokha nakong ea likhetho tsa la 22 Mphalane 2022 mabapi le meputso ea bona ea ts’ebetso, hore ho ileng hoa tumisoa ke sepolesa hore mofumahali oa hae le ba neng ba tsamaea le eena ba utsoitse chelete ha se ‘nete.
O re bonnete ba taba ke hore chelete e joalo e utsoitsoe ke ona mapolesa lapeng ha hae, ka la 06 ‘Mesa 2023 mots’eare moo a ileng a khakhatha le ho fasa mofumahali oa hae le ba neng ba tsamaea le eena ka liketane maoto le matsoho.
A re e se e le nako ho feta selemo joale ba bile ba lata sa bobeli ‘me eena joaloka monna oa Mosotho o lumela hore moo likhang li leng teng, makhotla ke ona a tla aba toka ka hona o sitoa ho kena-kenana le litaba tse seng li le ka makhotleng.
O itse nyeoe ena e tekuoe ke mapolesa Lekhotleng la ‘Maseterata Maseru boteng ba boemeli ba IEC ka la 11 ‘Mesa 2023 kamora ho boloka mofumahali oa hae le ba neng ba e-na le eena matsatsi a ts’eletseng ba sa je, ‘me tebello e ne e le ea hore e tla ba likhang li se li ts’ohluoe empa chelete eo e se e phethile mabaka ao e neng a e reretsoe ke beng ba eona.
“Ka bomalimabe, mapolesa a bonahala a se a se na thahasello ea ho fumana ‘nete ea taba ea hore bona ha ba utsoa chelete empa joale beng ba chelete ba bolaoa ke tlala, ho touta le ho kena kahara mekitlane ka ts’epo ea hore chelete ea bona e tla khutla.” Ke Mohatle eo.
