Moeletsi oa Basotho Beke ea 34 har’a selemo
Labobeli
Ho baloa Bukeng ea Tšenolo. (14,14-19)
“Nako ea kotulo e fihlile, ka ha se kotuloang lefatšeng se butsoitse.”
‘Na Joannes, ka talima, ‘me ha hlaha leru le lesoeu ‘me holim’a leru ho ne ho lutse ea tšoanang le Mor’a motho, a le mofapahloho oa gauda hlohong, a tšoere sekele e bohale letsohong.
Eaba lenyeloi le leng le tsoa tempeleng: ka lentsoe le phefa la hoeletsa ea lutseng holim’a leru la re: Kenya sekele ea hau, u kotule; hobane nako ea kotulo e fihlile kaha se kotuloang lefatšeng se butsoitse. Joale ea lutseng holim’a leru a kenya sekele ea hae lefatšeng, ‘me lefatše la kotuloa.
Lenyeloi le leng hape la tsoa tempeleng e leholirmog, le lona le tšoere sekele e bohale. Eaba lenyeloi le leng le nang le matla holim’a mollo, le tsoa aletareng: ka lentsoe le phefa la hoeletsa le nkileng sekele e bohale, la re: Kenya sekele ea hau e bohale, ‘me u kotule masihla a morara oa lefatše, hobane morara o s’o butsoitse.
Joale lenyeloi leo la kenya sekele ea lona e bohale lefatšeng, ‘me la kotula morara oa lefatše, ‘me la o akhela setlhotlelong se seholo sa khalefo ea Molimo.
PESALEMA 95
MORENA O TLIL’O AHLOLA LEFATšE.
Khumamelang Morena
ea tlotlehang ‘me ea halalelang,
thothomelang pel’a hae lona mafatše ‘ohle.
Bolellang lichaba le re: “Morena ke khosi!”
Ka hona lefatše le tiile, le ke ke la sisinyeha.
O ahlola lichaba ho se leeme.
Maholimo a ke a thabe, le lefatše le nyakalle.
Leoatle le ke le rore
‘moho le tsohle tse ka ho lona.
Masimo a ke a nyakalle, le tsohle tse ho ‘ona.
Lifate tsohle tsa meru li etse litlatse tsa thabo,
pel’a Morena, hobane oa tla,
o tlil’o ahlola lefatše.
A ke a ahlole lefatše ka toka,
le lichaba ka ‘nete ea hae.
Ho baloa Evangeling e halalelang e ngotsoeng ke Luka. (21,5-11)
“Lejoe le ke ke la siuoa holim’a lejoe le leng.”
Ka nako eo, batho ba bang ba ne ba bua ka Tempele, ba re e ahiloe ka majoe a matle ‘me e khabisitsoe ka limpho. Jesu a re ho bona: Ho tla tla matsatsi ao ka ‘ona, linthong tseo le li bonang, lejoe le ke keng la siuoa holim’a lejoe le leng, le sa liheloe fatše. Eaba ba ‘motsa, ba re: Moruti, tseo li tla etsahala neng, ‘me pontšo e tla ba efe ha li tla qala ho etsahala?
Jesu a ba araba, a re: Hlokomelang, le tle le se ke la thetsoa hobane ba bangata ba tla tla ka lebitso la ka, ba re: Ke ‘na Kriste ‘me nako e se e le haufi. Empa le se ke la ba sala morao. Le hona mohla le utloang lintoa le meferefere, le se ke la tšaba; e ka khona tsena li etsahale pele, empa e tla be e e-s’o be bofelo.
A eketsa, a re: Sechaba se tla tsohela sechaba matla, le muso ‘muso o mong: ‘me ho tla ba teng litšisinyeho tse kholo tsa lefatše libakeng tse ling, le mafu a seoa le Iitlala libakeng tse ling: ho be le lintho tse tšosang le lipontšo tse kholo leholimong.
