Moeletsi oa Basotho Beke ea 34 har’a selemo
‘Mantaha
Ho baloa Bukeng ea Tšenolo. (14,1-3.4-5)
“Lebitso la Kriste le la Ntat’ae le ngotsoe liphatleng tsa bona.”
‘Na Joannes ka bona Konyana e eme thabeng ea Sione, e e-na le batho ba likete tse lekholo le mashome a mane a metso e mene, ba ngotsoeng lebitso la eona le lebitso la Ntat’a eona liphatleng tsa bona. ‘Me ka utloa lentsoe le tsoang leholimong, le joaloka ho thoathoaretsa ha sealuma se bohale.
‘Me lentsoe leo ke le utloileng e ne eka ke molumo oa baletsi ba liharepa ha ba tilinya liharepa tsa bona; ba bina ho kang sefela se secha pel’a terone le pel’a libopuoa tse phelang tse ‘ne le maqheku, ‘me ho ne ho se ea ka binang sefela seo, ha e se bao ba likete tse lekholo le mashome a mane a metso e mene, ba lopolotsoeng lefatšeng.
Ke bona ba latelang Konyana hohle moo e eang Teng; ke bona ba lopolotsoeng har’a batho e le lithaka-ngoaha ho Molimo le ho Konyana. Leshano ha lea ka la fumaneha molomong oa bona: ba hloka sekoli, pel’a terone ea Molimo.
PESALEMA 23
O JOALO MOLOKO O BATLANG HỌ HLAHA PEL’A HAU, MORENA.
Lefatše ke la Morena le tsohle tse ho lona:
lefatše le baahi bohle ba lona.
O n’a le thehe holim’a maoatle,
a le tiisa holim’a maliba.
Ke mang ea ka nyolohelang thabeng ea Morena,
ke mang ea ka emang qalong e halalelang ea hae?
Ke ea se nang mali matsohong,
ea pelo e hloekileng.
Enoa ke eena ea tla fumana mahlohonolo ho Morena,
ea tla ahloleloa ke Molimo, mopholosi oa hae.
O joalo moloko oa ba mo batlang,
oa ba batlang ho hlaha pel’a hau,
uena Molimo oa Jakobo.
Ho baloa Evangeling e halalelang e ngotsoeng ke Luka. (21,1-4)
“A bona mohlolohali ea futsanehileng a akhela licheletenyana tse peli tsa koporo.”
Ka nako eo, ha Jesu a talima, a bona barui ba akhelang limpho tsa bona polokelong ea Tempele. A bona le mohlolohali e mong ea futsanehileng a akhela licheletenyana tse peli tsa koporo.
Jesu a re: Ruri kea le bolella, mohlolohali enoa ea futsanehileng o akhetse haholo ho feta bohle. Hobane bana kaofela ba nyehetse seo ba se nkileng boruing ba bona, athe eena o nyehetse seo a se nkileng bofutsaneng ba hae, tsohle tseo a nang le tsona tsa ho phela.
