Moeletsi oa Basotho Beke ea 33 har’a selemo
Laboraro
Ho baloa Bukeng ea Tšenolo. (4,1-11)
“Oa halalela Morena Molimo ea matla ‘ohle, Ea bileng teng, Ea leng teng ‘me Ea tlang ho tla.”
‘Na Joannes ka bona monyako o butsoe leholimong ‘me lentsoe leo ke neng ke le utloile pele le kang molumo oa terompeta, la bua le ‘na, la re: Nyolohela mona ‘me ke tla u bontša tseo e ka khonang li etsahale kamor’a tseo.
‘Me hang moea oa ka oa hapeha ‘me bonang, terone e ne e behiloe leholimnong, ‘me e mong o n’a lutse ho eona. Ea lutseng o n’a bonahala a tšoana le lejoe la jaspe le la sardone; ‘me terone e ne e likalikelitsoe ke mookoli o tšoana le emeralda.
Terone e ne e teetsoe hare ke litulo tse mashome a mabeli a metso e mene: holim’a litulo tseo ho ne ho lutse maqheku a mashome a mabeli a metso e mene, a apere liaparo tse tšoeu, a roetse mefapahloho ea gauda lihlohong. Ho ne ho tsoa teroneng mahalima, melumo le lialuma: ‘me mabone a supileng a ne a khantšitsoe pel’a terone: ke eona meea e supileng ea Molimo.
Pel’a terone ho ne ho tšoana le leoatle le kang galase, le tšoanang le kristale. Ka hare ho terone le ho e potoloha, ho ne ho le teng libopuoa tse phelang tse ‘ne tse tletseng mahlo kapele le kamorao.
Sebopuoa se phelang sa pele se ne se tšoana le tau, sa bobeli le namane, sa boraro se ne se e-na le sefahleho se kang sa motho, le sa bone se ne se tšoana le ntsu e fofang.
Libopuoa tse phelang tse ‘ne tseo, se seng le se seng sa tsona se ne se e-na le mapheo a tšeletseng, ‘me se tletse mahlo ka nga tsohle le kahare, ‘me li ne li sa phetse nyene le bosiu ho re: Oa halalela! Oa halalela! Oa halalela! Morena Molimo ea matla ‘ohle, Ea bileng teng, Ea leng teng ‘me Ea tlang ho tla!
Neng le neng ha libopuoa tse phelang li tlotlisa, li hlompha ‘me li leboha ea lutseng teroneng ‘me ea phelang kamehla le mehla, maqheku ao a mashome a mabeli a metso e mene a itihela fatše kapel’a ea lutseng teroneng, a khumamela Ea phelang kamehla le mehla, ‘me a akhela mefapahloho ea ona pel’a terone, a ntša re:
Hoa u lokela, Morena, uena Molimo oa rona, ho amohela letlotlo tlhompho le matla, hobane u bopile lintho tsohle ‘me ke ka thato ea hau li bileng teng, ‘me li bopiloeng.
PESALEMA 150
UA HALALELA, UA HALALELA, UA HALALELA, MORENA MOLIMO EA MATLA ‘OHLE.
Rorisang Morena ka sehalalelong sa hae,
mo roriseng leholimong la matla a hae.
Mo roriseng ka baka la liketso tse matla tsa hae,
mo roriseng ka baka la boholo ba hae
bo ke keng ba lekanngoa.
Mo roriseng ka molumo oa terompeta,
mo roriseng ka harepa le Cithara,
mo roriseng ka moropa le mehobelo,
mo roriseng ka seletsa se likhoele le ka phala.
Mo roriseng ka cimbala e khabolang,
mo roriseng ka cimbala e molumo.
Tsohle tse phefumolohang
li ke li rorise Morena.
Ho baloa Evangeling e halalelang e ngotsoeng ke Luka. (19,11-28)
“Ke ka baka la’ng ha u sa ka ua beha chelete ea ka bankeng?”
Ka nako eo, Jesu a bolela papiso e ‘ngoe, hobane o n’a sa le haufi le Jerusalema, ‘me ba ne ba kholoa hore ‘muso oa Molimo o s’o le haufi le ho bonahatsoa, a re ho bona:
Motho e mong oa leloko la borena o n’a e-ea lefatšeng le hole ho nehoa litokelo tsa borena teng, a nt’o khutla. A bitsa ba leshome, ba bahlanka ba hae, a ba neha liranta tse leshome, ‘me a re ho bona: Hoebang ka tsona, ho fihlela ke khutla. Athe batho ba ha habo ba ne ba mo hloile, ‘me ba roma maqosa kamor’a hae ba re: Ha re rate ho busoa ke motho enoa.
‘Me ha etsahala hore hoba a khutle a nehiloe litokelo tsa borena, a laele hore a bitsetsoe bahlanka bao a neng a ba nehe chelete, a tle a tsebe hore na e mong le e mong o fumane phaello e kae. Eaba oa pele oa fihla, a re: Morena ranta ea hau e tsoetse liranta tse leshome. A re ho eena: Ke hantle, mohlanka ea molemo, ka hobane u ile ua tšepeha tabeng e nyenyane, u tla busa metse e leshome. Oa bobeli a tla, a re: Morena, ranta ea hau e entse liranta tse hlano. Le ho eena, a re: U tla busa metse e mehlano.
Ha tla e mong, a re: Morena, ke ena ranta ea hau, eo ke ileng ka e boloka e phuthetsoe ka lesela. Hobane ke ne ke u tšaba, kaha u le motho ea thata; u nka seo u sa kang ua se beha, ‘me u kotula seo u sa kang ua se jala.
A re ho eena: Ke u ahlola ka lipolelo tsa hau, mohlanka ea khopo. U ne u tseba hore ke motho ea thata, ea nkang seo a sa kang a se beha ‘me ea kotulang seo a sa kang a se jala. Ke ka baka la’ng ha u sa ka ua beha chelete ea ka bankeng na, e le hore mohla ke khutlang ke e ntše hammoho le phaello ea eona?
A nt’o re ho ba neng ba le teng: Mo amoheng ranta ea hae, ‘me le e fe ea nang le liranta tse leshome. Ba re ho eena: Morena, o sa e-na le liranta tse leshome! Ke re ho lona, mang le mang ea seng a e-na le letho, o tla fuoa le ho feta, athe ea se nang letho, o amohuoa le seo a ka bang le sona.
Ha e le lira tseo tsa ka tse sa kang tsa rata hore ke li buse, li tliseng mona ‘me le li bolaele mahlong a ka.
