Nthabeleng Seitlheko Mokhatlo oa Naha o shebaneng le Bophelo bo botle le mafu a sethoathoa o kopane le mafapha a litaba tsa bophelo kahar’a tikoloho e ka boroa ho Afrika hore lefu lena le lokela ho eloa hloko joaloka mafu ohle. Litaba tsena li boletsoe ke Mookameli oa Mokhatlo ona Nthabeleng Hlalele, ka la 15 Loetse monongoaha.
O re ke lekhetlo la pele Naha ea Lesotho e ba le moralo oa ho loantša lefu lena le mafu a mang a amanang le lona ho qoba sekhobo le phano ea litšebeletso tsa bophelo tse ntlafetseng bakeng sa batho ba lefu lena. A re ke tumelo ea bona hore le tla phamoleloa holimo joaloka mafu ohle ‘me lingaka tse lokelang li be teng.
Lebitsong la Moemeli oa Mokhatlo oa Lefatše oa Bophelo (WHO) Lesotho Dr. Messina Zbeco, o hlalositse hore ha se feela ho fana ka tšehetso ho batho ba lefu lena empa ke ho beha sechaba leseling ho qoba khoboso bakuling ba lefu lena.
A re ho bohlokoa hore ba fumane litšebeletso tsa bopheli tse ntlafetseng, hape a bontša hore mosebetsi oa bona ke ho thusa linaha ho loantša mafu ka ho fapakana ha ona ‘me a kelello ha se mokhelo.
Lebitsong la Lekala la Bophelo Dr. Azukuike Benjamin Nwako, o hlalositse hore lefu lena le teng, ka hoo lekala le sebetsa ka matla bakeng sa bophelo bo botle ba batho bohle le ho qoba sekhobo sa mafu afe kapa afe kahar’a sechaba.
E mong oa bakuli ba lefu lena ‘Mampho Pitso, o hlalositse hore bothata bo boholo ke ho se amohelehe kahar’a sechaba, likolong le bosieo ba lingaka bo sitisang kalafo e nepahetseng.
O re o hloka ho etsa lintho tse phathahanyang kelello ea hae, kaha a sitoa ha lefu lena le tsohile, ka hona o ipilelitse ho Lekala la Bophelo ho phamolela litaba tsena holimo hobane batho ba bangata ba na le bothata. Lefatšeng ke bonyane batho ba kaholimo ho 50 millione ba phelang le lefu lena.
