Moeletsi oa Basotho Beke ea 33 har’a selemo
Labobeli
Ho baloa Bukeng ea Tšenolo. (3,1-6.14-22)
“Ha motho a mpulela monyako, ke tla kena ha hae, ke je le eena.”
‘Na Joannes ka utloa Morena a re ho ‘na: Ngolla Lenyeloi la kereke e Sardise u re: Ke tsena tse boleloang ke ea nang le meea e supileng ea Molimo, le linaleli tse supileng: Ke tseba mesebetsi ea hau; u bitsoa ea phelang, athe u shoele.
Tsoha ‘me u matlafatse bophelonyana bo ntseng bo le ho uena bo haufi le ho fela: Ha ke fumane mesebetsi ea hau e le e phethehileng mahlong a Molimo oa ka. Hopola hle mokhoa oo ka oona u amohetseng seo u se rutiloeng. U se mamele ‘me u bake. Ha u sa tsohe, ke tla tla ho uena joaloka lesholu, u sa tsebe nako eo ke tla tla ho uena ka eona.
Empa ho teng Sardise ba seng bakae ba lona ba sa kang ba silafatsa liaparo tsa bona, ‘me ba tla mphelehetsa ba apere bosoeu, hobane ba loketse.
Ea hlolang o tla apara joalo liaparo tse tšoeu, ‘me nke ke ka hlakola lebitso la hae bukeng ea bophelo, ‘me ke tla bolela lebitso la hae pel’a Ntate le pel’a manyeloi a hae. Ea nang le litsebe a utloe se bolelloang likereke ke Moea.
Hape ngolla Lenyeloi la kereke e Laodikea, u re: Ke tsena tse boleloang ke ea leng Amen, paki e tšepahalang ea ‘nete, mohloli oa libopuoa tsa Molimo:
Ke tseba mesebetsi ea hau: ha u bate, ha u chese. Hoja ua bata kapa ua chesa! Joale hobane u le foofo ‘me u sa bate, u sa chese, ke se ke tla u hlatsa molomong oa ka. Uena u re: Ke morui, ke ruile tse ngata, ha ke hloke letho. Empa ha u tsebe hore u malimabe, u soto, u mofutsana, u sefofu ‘me u feela.
Ke u eletsa ho reka ho ‘na gauda e hloekisitsoeng mollong, u tl’u be morui. Reka le liaparo tse ts’oeu, u ikapese ‘me u pate lihlong tsa bofeela ba hau. Reka le moriana u tlotse mahlo a hau ka oona, u tle u bone. Bao ke ba ratang kea ba khalemela ‘me kea ba otla. U chesehele hle, ‘me u bake! Bona, ke eme monyako ‘me kea kokota. Ha motho a ka utloa lentsoe la ka ‘me a mpulela monyako, ke tla kena ha hae, ke je le eena, le eena le ‘na.
Ea hlolang ke tla mo fa ho lula le ‘na teroneng ea ka, joaloka ha le ‘na ke hlotse ‘me ke lutse le Ntate teroneng ea hae, Ea nang le litsebe a utloe se bolelloang likereke ke Moea.
PESALEMA 14
EA TLA HLOLA KE TLA ‘MEHA PEL’A KA TERONENG EA KA.
Morena, ke mang ea ka kenang tlung ea hau,
ke mang ea ka ahang thabeng e halalelang ea hau?
Ke ea sa nyatseheng metsamaong ea hae,
ea etsang tse lokileng,
ea buang ‘nete e tsoang pelong ea hae.
Eo leleme la hae le sa etselletseng,
ea sa etseng oa habo hampe,
ea sa nyefoleng ngoan’abo.
Mahlong a hae ea khopo oa nyeliseha,
empa batho ba tšabang Morena b’a hlompheha.
Ha a alimane ka chelete a lebeletse phaello,
ha a amohele tịotjo ho tsoa ho ea se nang molato.
Ea etsang tsena
a ke ke a oa le khale.
Ho baloa Evangeling e halalelang e ngotsoeng ke Luka. (19,1-10)
“Mor’a motho o tlile ho batla le ho pholosa se neng se lahlehile.”
Ka nako eo, eare hoba Jesu a kene Jeriko, eaba o feta har’a motse. Joale monna ke eo, ea bitsoang Zakea, hloho ea bakhafisi, eo e neng e le morui. O n’a batla ho bona hore na Jesu ke mang; empa o n’a sitoa ka baka la letšoele, hoba o n’a le mokhutšoanyane seemong.
Eaba o mathela pele, a hloella sefateng sa sikomora a tle a ‘mone, kaha a n’a tla feta teng. Eare ha Jesu a fihla qalong eo, a lelaletsa mahlo holimo, a re ho eena: Zakea, potlaka u theohe, hobane e ka khona ke fapohele ka tlung ea hau kajeno lena. Eena a theoha ka potlako, ‘me a mo amohela ka thabo. Bohle, ha ba bona, ba koma-koma, ba re: O fapohetse ha monna oa moetsalibe.
Empa Zakea a ema, a re ho Morena: Bona, Morena, ke fa mafutsana karolo ea bobeli ea lintho tsa ka; ‘me ha ke fumane ho hong ho motho ka qhekello, ke ‘museletse ha ne. Jesu a re ho eena: Kajeno pholoho e hlahetse ntlo ena, hobane le eena enoa ke mor’a Abrahama. Efela Mor’a motho o tlile ho batla le ho pholosa se neng se lahlehile.
