Moeletsi oa Basotho Beke ea 31 har’a selemo
Laboraro
Sehopotso sa Bahalaleli bohle ba Afrika
Ho baloa Lengolong la Moapostola Paulosi ho Ba-Filipi. (2,12-18)
“Le sebeletse pholoho ea lona; hobane ke Molimo ea sebetsang ka ho lona ho rata le ho phetha.”
Baratuoa, joaloka ha le bile batho ba mamelang kamehla, le ke le sebeletse pholoho ea lona ka tšabo le ka thothomelo, e seng ha ke le teng feela, empa haholo hona joale ha ke le sieo. Hobane ke Molimo ea sebetsang ka ho lona ho rata le ho phetha, ka ho ea ka boithatelo ba hae.
Etsang tsohle le sa korotle, le sa phehisane khang, e leng hore le hloke molato le nyatseho le be bana ba phethehileng ba Molimo ba phelang har’a sechaba se bolotsana, se khopo, seo le khanyang har’a sona joaloka linaleli sebakeng, ka ho se tsebisa lentsoe la bophelo. Ha le etsa joalo, ke tla ithorisa ka lona tsatsing la Kriste, hobane e tla ba ha kea mathela lefeela, leha e le ho sebeletsa lelea.
Mohlomong mali a ka a tla tšoloha sehlabelong le tšebeletsong ea tumelo ea lona. Ha hona ho ka etsahala, nka thaba le ho arolelana thabo ea ka le lona bohle. Ka mokhoa o tšoanang le lona le tšoanetse ho thaba le ho arolana thabo ea lona le ‘na.
PESALEMA 26
E MORENA KE LESELI LA KA LE PHOLOHO EA KA
Morena ke leseli la ka le pholoho ea ka,
nka tšaba mang?
Morena ke tšireletso ea bophelo ba ka,
nka tšosoa ke mang?
Seo feela ke se kopang ho Morena,
seo ke se laba-labelang,
ke ho lula tlung ea Morena
matstsi ‘ohle a bophelo ba ka,
hore ke tle ke bohe botle ba Morena,
‘me ke ‘matle tempeleng e halalelang ea hae.
Ke kholoa ruri hore ke tla bona molemo oa Morena
Lefatšeng la ba phelang.
Tšepa Morena, o tšoare o tiee,
beta pelo, o tšepe Morena.
Ho baloa Evangeling e halalelang e ngotsoeng ke Luka. (14,25-33)
“Mang kapa mang ea sa teleng tsohle tseo a li ruileng, e ke ke ea e-ba morutuoa oa ka.”
Ka nako eo, matšoele a maholo a na tsamaea le Jesu, ‘me a retelehela ho ‘ona, a re: Ha motho a ka tla ho ‘na, empa a sa hloee ntat’ae le ‘m’ae le mosali le bana babo le likhaitseli, esita le bona bophelo ba hae, o sitoa ho ba morutuoa oa ka. ‘Me ea sa jareng sefapano sa hae, a ntšala morao, e sitoa ho ba morutuoa oa ka.
Ke mang har’a lona, eo ekareng ha a rata ho aha tora, a ke keng a qala ka ho lula fatše ho lekanya litšenyehelo, a tle a bone hore na o na le matla a ho phetha mosebetsi? Esere, ha a se a behile motheo, joale a sitoa ho qeta, e be moo bohle ba shebeletseng ba qala ho mo ja litšeho, ba re: Motho eo o qalile ho aha, joale o sa hloleha!
Kapa ke ofe morena, eo ekareng ha a tla ea futuhela morena e mong, a ke keng a qala ka ho ula fatše, a ipotsa hore na ka likete tse leshome a ka ba le matla a ho thulana le ea nang le likete tse mashome a mabeli na? Ho seng joalo, ekare eo a sa le hole, a romela maqosa ho ea kopa khotso.
Ka mokhoa o joalo, mang kapa mang oa lona ea sa teleng tsohle tseo a li ruileng, e ke ke ea e-ba morutuoa oa ka.
