Moeletsi oa Basotho Beke ea 28 har’a selemo
Sehopotso sa Ignatius oa Antiokia, Mobishopo le Moshoela-Tumelo
Labone
Ho baloa Lengolong la Moapostola Paulosi ho Ba-Efese. (1,1-10)
“O ikhethetse rona ka Kriste, lefatše le e-s’o thehoe.“
Paulosi, moapostola oa Jesu ka thato ea Molimo, ho bahalaleli bohle ba leng Efese le ho ba lumetseng ho Kriste Jesu. Mohau oa Molimo Ntat’a rona le oa Morena Jesu Kriste, hammoho le khotso e tsoang ho bona, li ke li be le löna.
Ho bokoe Molimo, Ntat’a Morena oa rona Jesu Kriste ea re hlohonolofalitseng ka mahlohonolo ‘ohle a moea ho Kriste maholimong. O ikhethetse rona ka Kriste, lefatše le e-s’o thehoe, hore re be bahalaleli, re hloke letheba mahlong a hae ‘me re phele ka lerato.
O itheretse rona e sa le pele ho re etsa bana ba hae ka Jesu Kriste, ka mosa le ka boithatelo ba hae, ho tle ho rorisoe letlõtlo la mohau oa hae, oo a re sitsitseng ka oona, ka baka la Mora oa hae ea ratehang.
Ke ka eena re fumaneng topollo le tšoarelo ea libe maling a hae. Hona ho bile ka ho ea ka bongata ba mehauhelo, eo Molimo a ileng a re ngatafaletsa eona ka bohlale le tsebo eohle ea hae. Ka ho ea ka seo, boithatelong ba hae, a se rerileng ho Kriste e sa le pele, Molimo o re tsebisitse sephiri sa thato ea hae, sa ho kopanya tsohle ho Kriste, e ka ba tse leholimong, e ka ba tse lefatšeng, ha linako tse behiloeng li fihlile.
PESALEMA 97
MORENA O BONTšITSE PHOLOHO EA HAE.
Binelang Morena sefela se secha,
hobane o entse tse tsotehang.
O hlotse ka seatla sa hae,
ka letsoho le halalelang la hae.
Morena o bontšitse pholoho ea hae,
o bonahalitse toka ea hae mahlong a lichaba.
O ikhopolitse mohau le botšepehi ba hae
bakeng la ntlo ea Israele.
Liqola tsohle tsa lefatše
li bone pholoho ea Morena oa rona.
Lona mafatše ‘ohle, etsetsang Morena litlatse,
hlasimolohang ke thabo, le mo roke ka lifela.
Binelang Morena ka harepa,
ka harepa le ka ‘mino.
Ka meletso ea literompeta le ea liphala,
etsetsang Morena Molimo litlatse.
Ho baloa Evangeling e halalelang e ngotsoeng ke Luka. (11,47-54)
“Moloko ona o tla botsoa mali a baprofeta bohle, ho qala ka mali a Abele ho isa maling a Zakaria.”
Ka nako eo, Jesu a bua le Bangoli le Bafarisi, a re: Ho malimabe lona ba ahelang baprofeta mabitla, athe ke bo-ntat’a lona ba ba bolaileng. Ruri le paka hore le lumellana le mesebetsi ea bo-ntat’a lona; efela ke bona ba ba bolaileng, ‘me lona le aha mabitla a bona.
Ka baka leo Bohlale ba Molimo bo itse: Ke tla ba romela baprofeta le baapostola, ‘me ba tla bolaea ba bang ba bona, ba hlorise ba bang; ho tle ho batloe molokong ona mali a baprofeta bohle, a ileng a tšolloa ha e sa le lefatse le thehiloe, ho qala ka mali a Abele ho isa maling a Zakaria ea ileng a bolaeloa pakeng tsa aletare le Tempele. E, ke re ho lona: a tla botsoa moloko ona.
Ho malimabe lõna, baruti ba Molao, hobane le nkile senotlolo sa tsebo! Lona ha lea ka la kena, ‘me le thibetse ba neng ba leka ho kena.
H’a nts’a bolela tseo, Bafarisi le baruti ba Molao ba qala ho itšema bora le ho mo khathatsa ka lipotso tse ngata, ba mo cheha ‘me ba leka ho tšoara taba e tsoang molomong oa hae.
