Moeletsi oa Basotho Beke ea 28 har’a selemo
Labobeli
Ho baloa Lengolong la Moapostola Paulosi ho Ba-Galata. (4,31-5,6)
“Se nang le thuso ha se ho bolla, empa ke tumelo e sebetsang ka lerato.”
Bana beso! Kriste o re lokolotse; re se re le batho ba nang le tokoloho. Ha ho le joalo, tiisetsang, ‘me le se ke la boela la kena tlas’a joko ea bokhoba.
Ke ‘na Paulosi ea le bolellang hore, ha le ka bolla, Kriste a ke ke a ba le thuso ea letho ho lona. Hape ke tsebisa mang le mang ea bollang hore o tlamehile ho phetha Molao kaofela. Lona ba batlang ho loka ka Molao, le ikhaohantse le Kriste; le thoko ho mohau oa Molimo.
Ha e le rona, ke ka tumelo re lebeletseng hore Moea o tla re fa ho loka hoo re ho ts’epileng, etsoe ho Kriste Jesu se nang le thuso hase ho bolla kapa ho se bolle, empa ke tumelo e sebetsang ka lerato,
PESALEMA 118
MORENA MOHAU OA HAU O KE O TLE HO ‘NA.
Mohau oa hau o ke o tle ho ‘na, Morena,
le pholoho ea hau, ka ho ea ka pallo ea hau,
U se ke ua amoha molomo oa ka
polelo e nang le ‘nete,
hobane ke ts’epile likahlolo tsa hau.
Ke tla boloka Molao oa hau ho-ea-ho-ile,
kamehla le mehla.
Ke tla itsamaela ka bolokolohi,
hobane ke batla litaelo tsa hau.
Melao ea hau e ntlhatsoa pelo,
ebile kea e rata.
Ke tla otlollela matsoho a ka melao ea hau,
ke inahane ka thato ea hau.
Ho baloa Evangeling e halalelang e ngotsoeng ke Luka. (11,37-41)
“Ha le ka fana ka lintho tsa lona ho mafutsana, tsohle li tla hloeka ho lona.”
Ka nako, ha Jesu a nts’a bua, Mofarisi e mong a mo kopa hore a tle ho ja hae. A ea, ‘me a lula lijong. Mofarisi eo a makala h’a bone hore Jesu h’a itlhatsoa pele a e-ja.
Morena re ho eena: E lona Bafarisi, le hlatsoa senoelo le mokeke kantle, empa ha e le ka hare ho lona ho tletse bosholu le bokhopo. Lithoto ting! Ana ea entseng ho leng kantle h’a ka a etsa le ho leng kahare? Empa ha le ka fana ka lintho tsa lona ho mafutsana, tsohle li tla hloeka ho lona.
