Moeletsi oa Basotho Sehopotso sa Gregory e Moholo, Mopapa
Beke ea 22 har’a selemo
Labobeli
Ho baloa Lengolong la Pele la Moapostola Paulosi ho Ba-Korinthe. (2,10-16)
“Motho ka bo-eena h’a utloisise seo e leng tsa Moea oa Molimo; motho ea nang le ona o hlalohanya tsohle.”
Bana beso ! Moea o fuputsa tsohle, esita le tsa botebo ba Molimo. Ha e le mothong, ke moea oa hae o leng ka ho eena o ka tsebang tsa motho. Ka mokhoa o tšoanang ha ho ea ka tsebang tseo e leng tsa Molimo, ha e se Moea oa Molimo.
Rona, ha rea ka ra amohela moea oa lefatše lena, ha e se Moea o tsoang ho Molimo, e le hore re tsebe tseo Molimo a re fileng tsona, ‘me ha re bua ka tsona, lipoleło tsa rona ha se tse hlalefileng tse rutoang ke batho, empa ke tseo re li rutiloeng ke Moea oa Molimo, etsoe re hlalosetsa ba nang le Moea tsa moea.
Ha e le motho ea hlokang Moea oo h’a utloisise tseo e leng tsa Moea oa Molimo. Ho eena ke bohlanya ‘me o sitoa ho li utloisisa hobane li elelloa ka Moea. Athe motho ea nang le Moea oo o hlalohanya tsohle, athe eena h’a hlalohanngoe ke motho. Hobane ke mang ea tsebang khopolo ea Morena, a tle a mo rute? Ha e le rona, re na le khopolo ea Kriste.
PESALEMA 144 (8-14. R. 17)
MORENA O LOKILE LITSELENG TSOHLE TSA HAE.
Morena o mohau, o mosa,
o lieha ho halefa, o mehauhelo e mengata.
Morena o molemo ho bohle,
o hauhela mesebetsi eohle ea hae.
Morena, mesebetsi ea hao kaofela e ke e u lebohe.
metsoalle ea hao e ke e u boke.
E ke e phatlalatse tlotla ea puso ea hao,
e ke e bolele matla a hao.
Ho tsebisa bana ba batho matla a hao,
letlotlo le botumo ba puso ea hao.
Morena o tšepahala lipolelong tsohle tsa hae,
o mohau liketsong tsohle tsa hae.
Morena o tšehetsa bohle ba khothometsehang,
‘me o kobolla bohle ba khokhopaneng.
Mahlo a bohle a u lebeletse,
hore u ba fepe ka nako ea teng.
Ho baloa Evangeling e halalelang e ngotsoeng ke Luka. (4,31-37)
“Kea tseba hore na u mang: U ea Halalelang oa Molimo.”
Ka nako eo, Jesu a theohela Kafarnauma, motseng oa Galilea, ‘me teng o n’a ba ruta ka matsatsi a lisabbatha. Ba ne ba makalla thuto ea hae, hobane ho ruta ha hae e ne e le hoa ea nang le matla.
Ho no ho le teng ka tlung ea thapelo motho ea nang le modemone o litšila, ea ileng a hooa ka lentsoe le phefa, a re: U re batla’ng, Jesu oa Nazaretha? Ana u tletse ho re timetsa? Kea tseba hore na u mang: U Ea Halalelang oa Molimo. Jesu a mo khalemela, a re: Thola, u b’u tsoe ho motho eo. Hoba modemone a lahlele motho eo fatše har’a bona, oa tsoa ho eena, o sa ka oa mo ntša kotsi.
Bohle ba tšoaroa ke tšabo: ‘me ba ne ba buisana, ba re: Polelo eo ke e joang? O laela meea e litšila ka matla le ka borena, ‘me ea tsoa! ‘Me botumo ba hae ba tlala kahohle naheng eo.
