Moeletsi oa Basotho Beke ea 19 har’a selemo
Labotšelela
Ho baloa Bukeng ea Moprofeta Ezekiele. (18,1-10.13.30-32)
“Ke tla le ahlola, e mong le e mong ka ho ea ka metsamao ea hae.”
Lentsoe la Morena le ile la mphihlela, la re: Ke’ng ha le ntse le pheta maele ana naheng ea Israele: “Bo-ntata ba jele morara o tala, ‘me meno a bana aa thella?” Ke hlapanya ka bophelo ba ka, ho rialo Morena Molimo, ha le sa tla pheta maele ana Israeleng. Bophelo ba motho ka mong ke ba ka, bophelo ba ntata joaloka ba mor’a hae ke ba ka. Ea etsang sebe ke eena ea tla shoa.
Mang le mang ea lokileng, ea etsang hoo e leng toka le tšoanelo, a sa ee meketeng ea lijo ea sehetene lithabeng, a sa lelaletse mahlo ho melimo ea bohata ea, ntlo ea Israele, a sa silafatse mosali oa mohahabo, a sa tlatlape motho, a busetsa ntho e behiloeng paneng, a sa utsoe, a ngoathela ea lapileng ‘me a apesa ea hlobotseng, a sa alimane ho fumana phaello, empa haholo phaello e fetang tekanyo, ea nenang bokhopo, a ahlola ka toka pakeng tsa motho le mohahabo, ea phelang ka ho ea ka litaelo tsa ka ‘me ea bolokang melao ea ka ka botšepehi: ruri motho eo o lokile ‘me o tla phela, ho rialo Morena Molimo.
Athe ha motho eo a tsoala mora eo e leng lesholu, ‘molai, kapa ea etsang ho hong hoa tsena, mora eo a ke ke a phela. Kaha a entse tsena tsohle tse nyonyehang, o tla shoa ruri: o tla ikarabella ka bo-eena ka lefu la hae.
Ha ho le joalo, lona ba ntlo ea Israele, ke tla le ahlola, e mong le e mong ka ho ea ka metsamao ea hae, ho rialo Morena Molimo. Sokolohang, le furalle libe tsohle tsa lona, esere bokhopo ba lona ba le isa timelong.
Lahlelang hole le lona libe tsohle tsa lona tseo le ntšitetsoeng ka tsona, le iketsetse pelo e ncha le moea o mocha. Ke’ng ha le rata ho shoa, lona ba ntlo ea Israele? Ha ke khahloe ke lefu la mang kapa mang, ho rialo Morena Molimo. Sokolohang, ‘me le phele.
PESALEMA 50 (12-15.18-19. R. 12)
MPOPELE PELO E HLOEKILENG, OHO MOLIMO.
Mpopele pelo e hloekileng, oho Molimo,
nchafatsa ka ho ‘na moea o tiileng.
U se ntahlele hole le sefahleho sa ha,
u se nkamohe Moea o Halalelang oa hau.
U mpuseletse thabo ea pholoho ea hau
ke tle ke tšehetsoe ke moea o motle.
Ba fosang ke tla ba ruta litsela tsa hau,
baetsalibe ba tla khutlela ho uena.
Hobane ha u khahloe ke sehlabelo.
leha nka u nyehela secheso, u ke ke ua se amohela.
Sehlabelo ho Molimo ke moea o robehileng;
pelo e robehileng, e matetetso,
uena Molimo ha u e khese.
Ho baloa Evangeling e halalelang e ngotsoeng ke Matheus. (19,13-15)
“Le se ke la hanela bana ba banyenyane ho tla ho ‘na; hobane ‘muso oa maholimo ke oa ba joaloka bona.”
Ka nako eo, bana ba banyenyane ba tlisoa ho Jesu hore a tle a ba behe matsoho, a ba rapelle; empa barutuoa ba ba khalemela. Eaba Jesu o re ho bona: Lesang bana ba banyenyane, ‘me le se ke la ba hanela ho tla ho ‘na: hobane ‘muso oa maholimo ke oa ba joaloka bona. ‘Me eitse hoba a ba behe matsoho, a tloha moo.
