Moeletsi oa Basotho Beke ea 19 har’a selemo
Labohlano
Ho baloa Bukeng ea Moprofeta Ezekiele. (16,59-63)
“U tla hopola selekane sa ka le uena, ‘me u hlajoe ke lihlong.”
Ke sena seo Morena a se bolelang: Ke tla u tšoara họ ea kamoo u entseng kateng, uena ea nyelisitseng kano ea hau, hoo u bileng ua roba selekane. Empa ha e le ‘na, ke tla hopola selekane seo ke neng ke se etse le uena ha u sa le mocha, ‘me ke tla hlaba selekane se ke keng sa fela le uena.
Uena u tla hopola metsamao ea hau, u hlajoe ke lihlong ha u amohela bana beno, baholoane le baena ba hau, bao ke tla u fa bona e le barali ba hau, empa e seng ka baka la selekane le uena.
Ke tla hlaba selekane le uena bocha, ‘me u tla tseba hore ke ‘na Morena. U tla hopola ‘me u hlajoe ke lihlong; mohla ke u tšoarelang tsohle tseo u li entseng, ha u sa tla hlola u ahlamisa molomo ka baka la sekhobo sa hau, ho rialo Morena Molimo.
PESALEMA (Js 12,2-6. R. 1)
KHALEFO EA HAO E KE E KOKOBELE, ‘ME U NTšELISE.
Ke eo Molimo ea mpholosang,
ke na le tšepo, ha ke sa tšaba:
hobane matla le thoko ea ka ke Morena,
ke eena pholoho ea ka.
Le tla ikhella metsi ka thabo
lilibeng tsa pholoho.
Bokang Morena, rapelang lebitso la hae,
le tumise liketso tsa hae lichabeng,
le li hopotse
hore lebitso la hae le phahame haholo.
Rokang Morena ka lifela, hobane o entse tse kholo,
li ke li tsejoe lefatšeng lohle.
Hooang ka thabo, le etse litlatse,
lona baahi ba Sione,
hobane ea halalelang oa Israele
o har’a lona ka botlotlehi ba hae.
Ho baloa Evangeling e halalelang e ngotsoeng ke Matheus. (19,3-12)
“Ke ka baka la bothata ba lipelo tsa lona, ha Moshe a le lumeletse ho hlala basali ba lona; empa ho ne ho se joalo tšimolohong.”
Ka nako eo, Bafarisi ba tla ho Jesu ka ho mo leka, ba re: Na monna o lumeletsoe ho hlala mosali oa hae ka lebaka lefe kapa lefe? A araba a re ho bona: Ha le e-s’o bale hore ea bopileng motho tšimolohong, o ba bopile e le e motona le e motšehali? ‘Me a re: Ka baka leo, motho o tla siea ntat’ae le ‘m’ae, ‘me o tla khomarela mosali oa hae, ‘me ba tla ba babeli nameng e le ‘ngoe. Ka baka leo, seo Molimo a se kopantseng, motho a se ke a se arola.
Ba re ho eena: Joale ke ka baka la’ng, ha Moshe a laetse ho neha mosali lengolo la tlhalo le ho mo lokolla na? A re ho bona: Ke ka baka la bothata ba lipelo tsa lona, ha Moshe a le lumeletse ho hlala basali ba lona; empa ho ne ho se joalo tšimolohong. ‘Me ke re ho lona: Mang le mang ea hlalang mosali ha e se haeba e le nyatsi ‘me a nyala e mong, oa feba; ‘me ea nyalang mosali ea hlaliloeng oa feba.
Barutuoa ba re ho eena: Haeba taba ea monna ea nang le mosali e le tjena, ha ho thuso ho nyala. A re ho bona: Ha se bohle ba amohelang lentsoe leo, ha e se ba nehiloeng joalo. Ho na le ba sa nyaleng, hobane ba tsoetsoe ke bo-‘m’a bona ba sitoa: ‘me ho na le ba sa nyaleng hobane ba entsoe joalo ke batho; ‘me ho na le ba sa nyaleng, hobane ba ikhethetse joalo, ka baka la ‘muso oa maholimo. Ea ka amohelang hona, a ho amohele.
