Moeletsi oa Basotho Beke ea 17 har’a selemo
Labotšelela
Ho baloa Bukeng ea Moprofeta Jeremia. (26, 11-1624)
“Kannete, ke Morena ea nthometseng ho lona ho le bolella tsena kaofela.”
Baprista le baprofeta ba bua le mahosana le sechaba kaofela, ba re: Motho enoa e ka khona a ahloleloe lefu, hobane kamoo le ikutloetseng ka litsebe tsa lona kateng, seo a se bolelang ka boprofeta ba hae se loantša motse ona.
Empa Jeremia a bolella mahosana le sechaba kaofela, a re: Ke Morena ea nthometseng ho profetela Tempele ena le motse ona, le ho bolela tsohle tseo le qetang ho li utloa. Ka baka leo ntlafatsang metsamao le liketso tsa lona, le mamele lentsoe la Morena, Molimo oa lona, ‘me le eena Morena o tla tlohela kotlo eo a le soketseng ka eona.
Ha e le ‘na, ke ‘na enoa ke matsohong a lona. Etsang ka ‘na kamoo le bonang ho lokela kateng. Feela le tsebe hantle hore, ha le ka la mpolaea, le tla ikarabella ka mali a motho ea se nang molato, lona ‘moho le baahi bohle ba motse ona. Hobane, kannete, ke Morena ea nthometseng ho lona ho le bolella tsena kaofela moo le ntseng le utloa.
Ke ha mahosana ‘moho le sechaba kaofela a bolella baprista le baprofeta, a re: Motho enoa ha a lokele ho ahloleloa lefu, hobane ke ka lebitso la Morena, Molimo oa rona, a buileng le rona.
Akhikame, mor’a Shafane, a sireletsa Jeremia, hore a se ke a neheloa liatleng tsa sechaba ho bolaoa.
PESALEMA 68 (15-16.30-31.33-34. R. 14)
NKARABE, MORENA, KA NAKO EA KHAUHELO.
Nqaolle seretseng ke tle ke se ke ka tetebela,
ke phonyohe koetseng e biluhang,
ke se ke ka nkoa ke metsi
ke se ke ka metsoa ke boliba
lebitla le se ke la nkoenya.
Nkarabe, Morena,
hobane mohau ua hau o ntsoela molemo,
u ntalime ka ho ea ka bongata ba mehauhelo ea hau.
Ke tla tlotlisa lebitso la Molimo ka pina,
ke mo phafe ka teboho.
Ba hlophehileng ba ke ba bone, ‘me ba thabe;
betang pelo, lona ba batlang Molimo,
hobane Morena o utloa mafutsana,
ha a khese ba hae ba litlamong.
Ho baloa Evangeling e halalelang e ngotsoeng ke Matheus. (14, 1-12)
“Heroda a romela chankaneng ho ea khaola Joannes hlooho, eaba barutuoa ba hae b’a tla, ba tsebisa Jesu.”
Ka nako eo, Morena Heroda a utloa botumo ba Jesu, ‘me a re ho bahlanka ba hae: Enoa ke Joannes Mohlatsoi! O tsohile bafung; ke ka baka leo a nang le matla a ho sebetsa mehlolo ena.
Efela Heroda o ne a ile a tšoara Joannes, a mo tlama, a mo kenya chankaneng ka baka la Herodiase, mohats’a moen’ae Filipi. Hobane Joannes o ne a ile a re ho Heroda: Ha ua lumelloa ho phela le eena. Empa leha Heroda a ne a rata ho bolaea Joannes, a tšaba sechaba: hobane se ne se mo talima e le moprofeta.
Joale, mohla mokete oa khopotso ea tsoalo ea Heroda, morali oa Herodiase a etsa chao sebaeeng, ‘me a khahlisa Heroda, hoo a bileng a mo tšepisa, ka ho ikana, hore o tla mo fa eng kapa eng eo a ka e kopang. Eena, ka ho susumetsoa ke ‘m’ae, a re: Mphe hlooho ea Joannes Mohlatsoi, ka mokeke, hona mona.
Morena a soaba, empa ka baka la kano le ka baka la ba lutseng le eena a laela hore moroetsana a e fuoe. A romela chankaneng ho ea khaola Joannes hlooho. Hlooho ea hae ea tlisoa ka mokeke, ea fuoa moroetsana, ‘me eena a e isa ho ‘m’ae. Eaba barutuoa ba Joannes b’a tla, ba nka setopo, b’a se pata, ba nt’o ea tsebisa Jesu.
