Moeletsi oa Basotho Beke ea 16 har’a selemo
Sehopotso sa Bridget ea Halalelang, Moitlami
Labobeli
Ho baloa Bukeng ea Moprofeta Mikea. (7, 14-15.18-20)
“U lahlela libe tsa rona bolibeng ba leoatle.”
Alosa sechaba sa hao ka lere la hau, mohlatsoana oa lefa la hau, o lulang o le mong morung o ka hare ho Karmele; o ke o alohele Bashane le Gileade, joaloka mehleng ea khale. Ak’u re bontše tse tsotehang, joaloka mohla u tsoang Naheng ea Egepeta.
Molimo ke ofe o kang uena? U hlakola melato, u leballa masalla a lefa la hau litlolo tsa ‘ona, u ke ke ua tlokoma ke khalefo ho-ea-ho-ile, hobane u khahloa ke ho re hauhela. U tla boela u re rekolohela, u tla felisa melato ea rona. U tla bontša botšepehi ho Jakobo, le mohau ho Abrahama, joaloka ha u hlapanyelitse bo ntat’a rona mehleng ea khale.
PESALEMA 84
MORENA, U RE BONTšE MOHAU OA HAO.
U khahliloe ke ho thusa lefatše la hao, Morena
u khutlisitse bana ba Jakobo kholehong.
U kokobelitse bohale ba hau kaofela,
khalefo e tukang ea hau e bobile.
U boele u re khutlise, Molimo mopholosi oa rona,
u khaotse ho re jara ka pelo.
Na u tla b’e sa le u re halefetse,
u pheella bohaleng ba hau
ho tloha molokong ho isa molokong?
Morena, u re bontše mohau oa hao,
‘me u re sitse ka pholoho ea hao.
Ho baloa Evangeling e halalelang e ngotsoeng ke Matheus. (12, 46-50)
“A otlolela letsoho ho barutuoa ba hae, a re: ‘M’e le bana b’eso ke bana.”
Ka nako eo, ha Jesu a sa ntsane a bua le matšoele, ‘m’ae le bana babo ba fihla, ba ema kantle, ba ntse ba batla ho bua le eena. E mong a re ho eena: ‘Mao le bana beno ke bana, ba eme kantle, b’a u batla.
Empa eena a arabela ea ‘molellang, a re: ‘M’e ke mang, le bana beso ke bo-mang na? A otlollela letsoho ho barutuoa ba hae, a re: ‘M’e le bana beso ke bana. Hobane mang le mang ea etsang thato ea Ntate ea maholimong, ke eena eo e leng ngoan’eso le khaitseli le ‘m’e.
