Moeletsi oa Basotho Beke ea 16 har’a selemo
‘Mantaha
MOKETE OA Maria Magdalena ea halalelang
Ho baloa Bukeng ea Sefela sa Lifela (3,1-4)
“Ka fumana moratuoa oa pelo ea ka.”
Monyali o re: Masiu ‘ohle, ha ke le liphateng ke ile ka batla moratuoa oa pelo ea ka; ka ‘matla, empa ka mo hloka. Ke tla tsoha, ke ee le motse, litseleng le mapatlelong, ke batle moratuoa oa pelo ea ka. Ka ‘matla, empa ka mo hloka.
Ka khahlana le balebeli, ba potolohang motse, ka re: “Na ekaba ha lea bona moratuoa oa pelo ea ka?” Hang hoba ke ba fete, ka fumana moratuoa oa pelo ea ka.
Pesalema 62 (2-6.8-9 R. 2)
MOEA OA KA O U NYORETSOE, MORENA MOLIMO OA KA.
Molimo, ke uena Molimo oa ka, ke u hlolohetsoe,
moea oa kạ o nyoretsoe uena:
‘mele oa ka o laba-labela uena,
joaloka lefatše le omeletseng,
le se nang letho, le hlokang metsi.
Ruri ke rata ho u bona Sehalalelong,
hore ke tle ke bohe matla a hao le letlotlo la hao.
Ka hobane mohau oa hao o molemo ho feta bophelo;
molomo oa ka o tla u tlotlisa.
Ruri ke tla u boka bophelong ba ka bohle,
ke tla phahamisa matsoho a ka ho u rapela.
Moea oa ka o tla khora
joaloka ea jeleng moko le mafura,
molomo oa ka o tla u roka
ka lentsoe le nyakaletseng.
Hobane u bile mothusi oa ka;
ke ithabela moriting oa mapheo a hao.
Moea oa ka o u khorametse,
‘me letsoho la hao lea ntšehetsa.
Ho baloa Evangeling e halalelang e ngotsoeng ke Joannes. (20, 1-2.11-18)
“Mosali, u llela’ng? U batla mang?”
Tsatsing le qalang beke, Maria Magdalena a ea lebitleng e sa le ka meso, ho sa le mara. A bona hore lejoe le tlositsoe lebitleng. Eaba o mathela ho Simone Peterosi le ho morutuoa e mong ea ratoang ke Jesu, ‘me
a re ho bona: Ba tlositse Morena lebitleng, ‘me ha re tsebe moo ba ‘mehileng teng.
Ha e le Maria Magdalena o n’a eme pel’a lebitla a nts’a lla. Ha a nts’a lla joalo, a inama a nyarela ka lebitleng. A bona manyeloi a mabeli a apereng liaparo tse ts’oeu, a lutse moo setopo sa Jesu se neng se behiloe teng, le leng hloohong, le leng maotong. A re ho eena: Mosali, u llela’ng? A re ho ‘ona: Ba tlositse Morena oa ka ‘me ha ke tsebe moo ba ‘mehileng teng.
Eare a sa rialo, a reteleha ‘me a bona Jesu a eme moo, empa a sa tsebe hore ke eena. Jesu a re ho eena: Mosali u llela’ng? U batla mang? Eena, ka ho hopola hore ke molemi oa serapa, a re ho eena: Monghali, ha eba ke uena ea mo nkileng, mpolelle moo u ‘meileng teng, ‘me ke tla mo lata.
Jesu a re ho eena: Maria! Eena a reteleha, a re ho eena: Rabboni! Ke hore: Moruti! Jesu a re ho eena: U se ke ua nthetsa, hobane ha ke e-s’o nyolohele ho Ntate; empa u ee ho bana beso u re ho bona: Ke nyolohela ho Ntate, eo e leng Ntat’a lona, ho Molimo oa ka eo e leng Molimo oa lona.
Maria Magdalena a ea bolella barutuoa a re: Ke bone Morena ‘me o mpoleletse tsena.
