Moeletsi oa Basotho Beke ea 9 har’a selemo
Laboraro
Ho baloa Lengolong la Bobeli la Moapostola Paulosi ho Timothi. (1,1-3.6-12)
“U tsosolose neho ea Molimo eo u e amohetseng ka peho ea matsoho a ka.”
Paulosi e leng moapostola oa Jesu Kriste ka thato ea Molimo ka baka la pallo ea bophelo bo ho Kriste Jesu, ho Timothi mor’a ka ea ratehang haholo. Ke u lakaletsa mohau, lereko le khotso e tsoang ho Molimo Ntate le ho Kriste Jesu Morena oa rona! Ke leboha Molimo eo ke mo lebeletsang, joaloka bo-ntate-moholo, ka letsoalo le hloekileng, hoba ha ke phetse ho u hopola nyene le bosiu lithapelong tsa ka.
Ke u laea hore u tsosolose neho ea Molimo eo u e amohetseng ka peho ea matsoho a ka. Hobane Molimo ha a ka a re neha moea oa tšabo empa oa matla, oa lerato le oa boitšoaro. Ka baka leo u se ke ua ba lihlong ho paka Morena oa rona, leha e le ‘na motlamuoa oa hae. Empa u mamelle bohloko le ‘na ka baka la Evangeli, ka matla a Molimo, ea re lopolotseng, ea re bitsitseng ka pitso ea hae e halalelang, e se ka baka la mesebetsi ea rona, empa e le ka morero oa hae, le ka mohau oo re o etselitsoeng ho Kriste Jesu, pele ho tlholeho ea linako.
‘Me kajeno pitso eo e bonahalitsoe ha Mopholosi oa rona Jesu Kriste a tlile lefatšeng, eena ea felisitseng lefu ‘me a senola bophelo bo sa feleng ka leseli la Evangeli, eo ke behiloeng ho e phatlalatsa, ke le moapostola le moruti oa eona.
Ke ka lebaka lena ke mamellang mahloko ana: empa ha ke lihlong ka eona, hobane ke tseba eo ke mo tšepileng ‘me ha ke na pelaelo hore o na le matla a ho boloka se behiloeng paballong ea ka, ho fihlela letsatsi lena le fihla.
PESALEMA 122 (1-2. R. 1)
KE LELALETSA MAHLO A KA HỌ UENA MORENA.
Ke lelaletsa mahlo a ka ho uena,
eo terone ea hae e leng maholimong.
Joaloka ha mahlo a bahlanka
a talima matsoho a beng ba bona,
le a lekhabunyane matsoho a mofumahali oa lona,
mahlo a rona le ‘ona a ho Morena, Molimo oa rona,
ho fihlela a re hauhela.
U re hauhele, Morena, u re hauhele,
hobane re nyelisitsoe ho feta tekanyo.
Ho baloa Evangeling e halalelang e ngotsoeng ke Mareka. (12,18-27)
“Molimo ha se Molimo oa ba shoeleng, empa ke oa ba phelang.”
Ka nako eo, ha tla ho Jesu ba-Sadduke ba reng ha ho tsoho ea bafu. Ba ‘motsa, ba re: Moruti, Moshe o re ngoletse molao o reng, ha motho ea nang le ngoan’abo a e-shoa ‘me a sia mosali, empa a se na bana, ngoan’abo o tšoanetse ho kenela mosali eo, a tle a tsosetse ngoan’abo leloko. Joale, bana ba supileng ba motho ba ne ba le teng. Oa pele a nyala mosali ‘me a shoa a sa ka a sia ngoana. Oa bobeli a mo nyala a mpa a shoa, ‘me le eena a sa sia ngoana. Ho bile joalo le ho oa boraro. Ka mokhoa o joalo ba supileng ba mo nyala, empa ha ba ka ba sia ngoana. Ka morao ho bohle le eena mosali a shoa. Mohla tsoho ea bafu, ha banna bao ba tsohile, na e tla ba mosali oa ofe ho bona, hobane e bile mosali oa bona ba supileng?
Jesu a araba, a re ho bona: Na ha le fose ka ho se tsebe Mangolo, leha e le matla a Molimo na? Hobane mohla ba tsohang bafung, batho ha ba na ho nyala leha e le ho nyaloa, empa ba tla ba joaloka manyeloi leholimong. Ha e le malokana le bafu ba tla tsoha, na ha lea ka la bala tsa sehlahla se tukang ke mollo, bukeng ea Moshe, ka moo Molimo a ileng a bua le eena, a re: Ke ‘Na Molimo oa Abrahama, le Molimo oa Isaaka, le Molimo oa Jakobo? Molimo ha se Molimo oa ba shoeleng, empa oa ba phelang. Ha ho le joalo, le fositse haholo.
