Tšeliso Thakholi Limathi tsa Lesotho tsa mabelo a mokoka, Lebenya Nkoka le Jobo Khatoane ba phahamisitse folakha ea Lesotho, ka ho hlaha maemong a bone le a bohlano ka tatellano, ha Namakoe Nkhasi a hlahile boemong ba borobong, lebelong le leholo la Soweto Marathon la bolelele ba 42.2 Km, le neng le tšoaretsoe Provincing ea Gauteng, Afrika Boroa ka la 5 Pulungoana monongoaha.
Nkoka o atlehile ho etsa nako ea 2:21:11 ha Khatoane a e ntse 2:21:17. Namakoe Nkhasi eena o nkile nako ea 2:24:09. Mohloli oa lebelong lena ke Ntsindiso Mphakathi oa Afrika Boroa ka nako ea 2:19:13. Ke eena monna oa pele oa Afrika Boroa oa ho hapa lebelo lena kamor’a lilemo tse 12. Athe ka ho basali mohloli ke Irvette van Zyl oa Afrika Boroa ka nako ea 2:34:16. Irvette van Zyl o se a hapile lebelo lena ka makhetlo a mane ka tatellano.
Naha ea Lesotho e sebelitse hantle mekhahlelong e hlahlamang ea lebelo lena, kaha Kamohelo Mofolo a hlahile boemong ba pele ka nako ea 1:08:04, lebelong la bolelele ba 21Km. ka mokhoa o tšoanang Tebello Ramakongoana eena o hlahile maemong a pele ka nako ea 0:29:02 lebelong la 10Km.
Matsatsi a se makae pele a leba lebelong lena, Lebenya Nkoka o ne a ile a bolella koranta hore le hoja a ilo qothisana lehlokoa le limathi tsa boemo ba machaba, o malala-a-laotsoe ho tlela Basotho tlholo lebelong lena. O ne a ile a bontša hore morero o moholo oa hae ke ho sebetsa ka thata ho bona hore haeba ho thoe o hlotsoe a mpe a be kahara ba leshome ba tla tsoa khoeleng pele.
A re qholotso e kholo papaling ena ea mabelo ke ho hloka botšehetsi. A ipiletsa ho Basotho bohle ba boithatelo bo botle ho etsa letsoho la monna.
