Tšeliso Thakholi Libapali tsa mehleng tsa sehlopha sa bolo ea maoto sa Bantu ka kopanelo le botsamaisi ba Bantu, ba ile ba tšoarela sebapali se hloahloa sa mehleng sa Bantu, Molefi ‘Valtez’ Lesenyeho mokete oa ho mo abela limpho tsa lijo le chelete e kaalo ka M1,000.00, e tlang ho mo thusa ho bona lingaka kaha a ntse a se na bophelo bo botle. Mokete ona o bile lapeng ha hae Lower Thamae, Maseru, ka la 16 Loetse monongoaha.
Khalala ena ea mehleng ea sehlopha sa Bantu, Valtez Lesenyeho o ile a amohela limpho tsena ka thabo le monyaka, ‘me thabo ena ha ea ka ea bonahala ho Lesenyeho feela, empa le ho libapali tsa mehleng tsa Bantu le botsamaisi ba eona kaha ba se ba ipopile ho ba ngatans ‘ngoe, ho tsoma libapali tsohle tsa khale tse kileng tsa bapalla sehlopha sa Bantu, ho li etela le ho li tšoarela mokete o tšoanang le oa Valtez.
Vice-President ea Pele ea sehlopha sa Bantu, Mofumahali ‘Mamoji Letsapo o hlalositse hore ke takatso ea bona e le botsamaisi ba ha joale tsamaisong ea Bantu ho kopana ‘moho le libapali tsa mehleng tsa Bantu ka sepheo sa ho thakelana malebela. “Sehlopha sena ha se sa rona re le bang, ke sa lona. Kae-kae ho na le moo le lokelang ho hlaha le re eletsa le moo le lokelang ho kenya letsoho kholisong ea sehlopha sena.”
A re bona e le botsamaisi ba Bantu ha ba rate ho tseba motho hore e ne e le sebapali sa bona sa mehleng h’a se a hlokahetse, empa ba lokela ho mo tseba a sa phela ba mo fe lerato le tšehetso e mo lokelang. A leboha mosebetsi o motle o entsoeng ke libapali tsa mehleng tsa Bantu tsa ho tla hloela Valtez.
E mong oa batsamaisi ba mehleng ba sehlopha sa Bantu, Monghali Samuel Maphathe o qalile pele ka ho lebohela Valtez Lesenyeho haele mona Morena Molimo a ntse a mo file bophelo. A re lehlohonolo leo ba ileng ba ba le lona nakong ea ho feta, ke hore libapali tsa Bantu e ne e le batho ba neng ba ipabola ka boitšoaro bo botle kantle le kahare ho lebala. A re ka mokete oa kajeno, e se e ntse e le qaleho ea ho kototsa libapali tsohle tsa Bantu moo li leng hona teng, e le ho tseba hore na li ntse li phela joang le ho fana ka tšehetso ho bao e bang ba se ba e-na le mathata a fapakaneng a bophelo. A ipiletsa ho botsamaisi ba Bantu ho kokota liofising tsohle, ho kopa lithuso ho tla phallela libapali tsa bona tsa mehleng.
Mong’a mokete Valtez Lesenyeho ‘Jersey no.11,’ o lebohile ka tsela e khethehileng lerato le tsotello eo libapali tsa mehleng le botsamaisi ba Bantu li e bontšitseng ho eena. A re boteng ba bona ke tlotla e kholo ho eena le ho ba lelapa la hae. A leboha bohle ba atlehisitseng mokete ona, ‘me a ba kopa ho tsoelapele ho bontša lerato lena, ho tšehetsa le ho hloela libapali tse ling tsa khale. Ke hona moketeng ona moo Valtez a ileng a fuoa mpho ea jesi ea sehlopha sa Bantu.
