Tšeliso Thakholi Likopano tsa Kriste Moprista li ketekile sehopotso sa Mohlomi oa Kopano ea bona, e leng Ntate Andrew Blais OMI, ‘mishoneng oa Christ the Priest, Motsekuoa, ka la 12 Phato 2023. Mokete o qalile ka Sehlabelo se Halalelang sa ‘Missa, se neng se eteletsoe pele ke Mobishopo oa Tikololoho ea Mohale’s Hoek, Mohlomphehi John Joale Tlhomola SCP.
Khothatsong ea hae o boletse hore lipalo li bua ka lerato, ‘me li re laela ho rata, ‘me ha re sa etse joalo re sa mamele taelo ena ea ho rata, re ithuhela thohako le ho ipitsetsa bomalimabe hobane Molimo ka bo-eena ke lerato. “Ha re sa etse joalo re tla be re sa rate Eena Molimo.” A rialo. A tiisa hore re bopetsoe ho rata.
Mobishopo Tlhomola a bontša hore ho rata Morena Molimo ke hona hore fumantšang litokelo tsa lefatše, e leng sona se tla re fa moputso oa rona leholimong. A re mangolo a boetse a re ruta hore lipelo tsa rona li etselitsoe ho khomarela Morena Molimo, ‘me li ke ke tsa fumana boiketlo kae kapa kae kantle le ho khomarela Morena Molimo.
A qetella ka hore lerato leo Ntate Blair a bileng le lona ho Morena Molimo le ho bona ke ho hloma likopano tsena tse peli, ‘me ho ne a utloisisa hore o lokela ho rata Molimo le oa habo. “Ke lona lerato leo re le bilelitsoeng kahare ho kereke le likopano tsena tse peli tsa rona.” A rialo.
Lebitsong la Bahlanka le Makhabunyane, Ntate Mandro John Kawe SCP o boletse hore ka mehla Ntate Blais o ne a rata ho tlotlisa Maria Movirigo, ka hona ba lokela ho itlotlisa ka makhabane ao, empa e kholo ka ho fetisisa ke ho ba le lerato la Molimo, la boena le la Kopano ea bona. A re Ntate Blais o ne a rata ho bona Kopano ea hae e hola, ‘me a rata Ma-Afrika ka pelo eohle ea hae. A ipiletsa ho litho tsa kopano ho etsisa makhabane a hae ka mehla.
H’a bua lebitsong la litho bathusi, Mofumahali ‘Mathato Lekhutle o itse Mohlomi oa Kopano o ne a thehe Kopano ea Makhabunyane, empa a bona hore ha hoa lekana hobane ba phela moo ba leng teng ba le bang, empa mosebetsi oa Kereke o tlameha ho anela hohle metseng, ‘me ke ha a tla theha sehlopha sa litho bathusi ho nanabetsa letsoho, hore mosebetsi oa Kriste o tsebe ho anetsoa hohle. A re mosebetsi oa litho bathusi ke ho anetsa thomo e reng; “le tla ba lipaki tsa ka ho isa lipheletsong tsa lefatše. Hobane re phela haae, malapeng moo re tlamehang ho ruta bana katekisima le ho ba ruta bophelo ka kakaretso.
Sr Eusebia Lerotholi h’a lokolisa tsa nalane ea bophelo ba Ntate Andrew Blais o itse o ile a tlotsetsoa Bopristabo Halalelang ka la 25 Mot’seanong 1929 Kopanong ea Maoblata a Maria ea emotsoeng a se na Sekoli. Ka la 15 Phupjane 1930 a fuoa thomo ea ho tla Lesotho, ‘me har’a e meng ea mesebetsi e mengata o sebelitse Seminaring e kholo ea St. Augustinus, Roma le St. Theresa.
