Moeletsi oa Basotho Beke ea 32 har’a selemo
‘Mantaha
Ho baloa Bukeng ea Moprofeta Ezekiele. (43:1-2.4-7)
“Letlotlo la Morena le ile la tlala Tempele.”
Matsatsing ao, lengeloi le ile la nkisa monyako oa Tempele o shebileng ka nq’a Bochabela. Ke moo letlotlo la Molimo oa Israele le ileng la fihla le hlaha Bocihabela, le e-tla ka molumo o kang oa metsi a leoatle, ‘me lefatše le ne le khanya letlotlo la hae.
Letlotlo la Morena la kena Tempeleng ka monyako o shebileng ka nq’a Bochabela. Moea oa nkuka, oa nkisa lebaleng le kahare. Ke moo letlotlo la Morena le ileng la tlala Tempele. Ka utloa e mong a bua le ‘na a le ka Tempeleng, lengeloi le ntse le eme pel’a ka. A re ho ‘na: “Mor’a motho, qalo ea terone ea ka e hona mona, qalo eo maoto a ka a hatang ho eona, e leng moo ke lulang har’a bana ba Israele ka mehla.”
PESALEMA 121
RE TLA EA KA TLUNG EA MORENA KA THABO.
Ke ile ka thaba ha ho thoe ho ‘na:
“A re eeng Tlung ea Morena.”
Joale maoto a rona a se a hatile
likhorong tsa hao, uena Jerusalema.
RE TLA EA KA TLUNG EA MORENA KA THABO.
Jerusalema e ahiloe e le motse
oo tsohle tsa oona li matahaneng hamonate.
Meloko eohle, e leng meloko ea Morena,
e nyolohela teng ho boka Morena
ho ea kamoo Israele a laetsoeng kateng.
RE TLA EA KA TLUNG EA MORENA KA THABO.
Ke moo ho behiloeng litulo tsa kahlolo,
litulo tsa ntlo ea Davida.
Kopelang Jerusalema khotso, le re:
“Ba u ratang ba ke ba pholohe.”
RE TLA EA KA TLUNG EA MORENA KA THABO.
Ka baka la bana beso le metsoalle ea ka
ke tla re: “Khotso e be le uena.”
Ka baka la ntlo ea Morena, Molimo oa rona,
ke tla u kopela boiketlo.
RE TLA EA KA TLUNG EA MORENA KA THABO.
Ho baloa Evangeling e halalelang e ngotsoeng ke Joannes (4:19-24)
“Bakhumameli ba ‘nete ba khumamela Ntate ka moea le ka nete.”
Ka nako eo, mosali oa mo-Samaria a re ho Jesu: Morena, kea bona, u moprofeta. Bo-ntat’a rona ba ile ba khumamela Molimo thabeng ena, athe lona le re ke Jerusalema moo e ka khonang ho khumameloe Molimo teng. Jesu a re ho eena: Mosali, nkholoe, nako ea tla, eo ka eona le sa tl’o hlola le khumamela Ntate thabeng ena kapa Jerusalema. Lona le khumamela seo le sa se tsebeng, athe rona re khumamela seo re se tsebang, hobane
pholoho e tsoa ho Bajodi. Empa nako ea tla e se e bile e fihlile eo ka eona bakhumameli ba ‘nete ba tla khumamela Ntate ka moea le ka ‘nete. Hobane bakhumameli ba joalo ke bona bao Ntate a ba batlang. Molimo ke moea, ‘me ba mo khumamelang ba lokela ho mo khumamela ka moea le ka nete.
