Sehopotso sa Clara ea Halalelang, Movirigo.

La 11 Phato 2026

Beke ea 19 har’a selemo

Labobeli

Ho baloa Bukeng ea Moprofeta Ezekiele. (2:8.3:4)

“Ka ja buka, ‘me ka hanong e n’e le monate joaloka linotsi.”

Uena, mor’a motho, u mamele seo ke u bolellang sona, u se ke ua mphetohela joaloka leloko lena la bafetoheli. U ahlame, u je seo ke tla u fa sona. Eitse ha ke sheba, ka bona letsoho le nanabeletsoa ho ‘na, le nkile buka e phetliloeng. A e phutholla ka pel’a ka: e n’e ngotsoe ka mahlakore a mabeli, ‘me ho eona ho n’o ngotsoe lilo, lipoboli le koli-ea-malla.

A re ho ‘na: Mor’a motho, ja seo u se fuoang, ja buka, ena, u nt’o ea bua le ntlo ea Israele. Kạ ahlama, ‘me a mpha buka ena, hore ke e je. Eaba o re ho ‘na: Mor’a motho, koenya buka ena eo ke u fang eona, u e tlatse mpa. Ka e ja, ‘me ka hanong e ne e le monate joaloka linots’i. A boela a re: Mor’a motho, e-ea ho ba ntlo ea Israele, u ba bolelle mantsoe a ka.

PESALEMA 118

MORENA LIPALLO TSA HAO LI MONATE HAKAKANG HANONG LA KA.

Ke thabela tsela ea litemoso tsa hao

ho feta maruo ‘ohle.

Litemoso tsa hao ke tsona tse ntlhatsoang pelo,

thato ea hao ke eona e nkeletsang.

MORENA LIPALLO TSA HAO LI MONATE HAKAKANG HANONG LA KA.

Molao o tsoang molomong oa hao o molemo ho ‘na

ho feta leruohali la gauda le silvera.

Lipallo tsa hao li monate hakaakang hanong la ka,

li feta linotši molomong oa ka.

MORENA LIPALLO TSA HAO LI MONATE HAKAKANG HANONG LA KA.

Litemoso tsa hao ke lefa la ka kamehla,

ke tsona tse nthabisang pelo.

Ke ahlamisa molomo, kea feheloa,

hobane ke lapetse molao oa hao.

MORENA LIPALLO TSA HAO LI MONATE HAKAKANG HANONG LA KA.

Ho baloa Evangeling e halalelang e ngotsoeng ke Matheus. (18:1-5.10.12-14)

“Hlokomelang, le se ke la nyelisa le ea mong oa ba banyenyane bana.”

Ka nako eo, barutuoa ba tla ho Jesu, ba re: Ha u bona, e moholo ke mang ‘musong oa maholimo? Eaba Jesu o bitsa ngoana e monyenyane, o mo emisa ka hare ho bona, o re: Ka ‘nete kea le bolella, ha le sa sokolohe la ba joaloka bana ba banyenyane, le ke ke la kena ‘musong oa maholimo. Ea ikokobetsang a be joaloka ngoana enoa e monyenyane, ke eena ea leng moholo ‘musong oa maholimo. Ea amohelang ngoana e monyenyane ea joaloka enoa, ka baka la lebitso la ka, o amohela ‘na.

Hlokomelang, le se ke la nyelisa le ea mong oa ba banyenyane bana, hobane, kea le bolella, mangeloi a bona leholimong a bona ka mehla sefahleho sa Ntate ea maholimong.

Ana lona le bona joang na? Ha motho a e-na le linku tse lekholo ‘me e ‘ngoe ea tsona e ka lahleha, ha a tl’o siea tse mashome a robong a metso e robong thabeng, a ea batla e lahlehileng? Ha a ka e fumana, ruri kea le bolella, o tla ithabela ka eona ho feta ka tse mashome a robong a metso e robong tse sa kang tsa lahleha.

Ka mokhoa o tšoanang, Ntat’a lona maholinong ha a rate hore le ea mong oa ba banyenyane bana a lahlehe.