Moeletsi oa Basotho Beke ea 15 har’a selemo
‘Mantaha
Ho baloa Bukeng ea Moprofeta Isaia. (1:11-17)
“Itlhatsoeng, le tlose liketso tse mpe tsa lona pel’a mahlo a ka.”
Lona babusi ba Sodoma, utloang lentsoe la Morena, lona sechaba sa Gomorrha, sekehelang molao oa Molimo oa rona tsebe.
Thuso ea mahlabelo a mangata a lona ke efe ho ‘na? Ho rialo Morena. Ke tennoe ke licheso tsa lipheleu le ke mafura a linonneng; ha ke khahloe ke mali a lipohoana, a linku le a liphoofolo. Ha le tlil’o itlhahisa pel’a ka, lea be le kopiloe ke mang hore le tl’o hatakela mabala a ka ka maoto?
Le se hlole le ntlisetsa linyehelo tsa bosaoana, mosi oa tsona oa nyonyeha ho ‘na. Ke sitoa ho iphapanyetsa mekete ea mathoaso a likhoeli, lisabbatha, pitso ea liphutheho, bokhopo bo khemang le mekete ea limetletsa.
Ke hloile mekete ea lona ea mathoaso a likhoeli le liboka tsa lona tse mahlonoko. Lia ntetebetsa, ke khathetse ke ho iphapanyetsa tsona. Ha le otlolla matsoho ho rapela, ke ipata mahlo; leha le ka atisa lithapelo, ha ke li mamele. Matsoho a lona a khenathetse mali.
Itlhatsoeng, le hloeke; tlosang liketso tse mpe tsa lona pel’a mahlo a ka. Khaotsang ho etsa bobe, le ithute ho etsa botle. Batlang toka, le thuse ea hateletsoeng. Ahlolelang khutsana, le buelle mnohlolohali.
PESALEMA 49
EA TSAMAEANG TSELENG EA ‘NETE KE TLA ‘MONTSA PHOLOHO EA MOLIMO.
Ha ke u nyatse ka baka la mahlabelo a hao,
etsoe u nketsetsa licheso ka mehla.
Ha ke hloke pohoana ea lesaka la hao,
leha e le phooko ea mohlape oa hao.
EA TSAMAEANG TSELENG EA ‘NETE KE TLA ‘MONTSA PHOLOHO EA MOLIMO.
U na le tokelo efe ea ho bolela melao ea ka,
le ea ho bolelisa selekane sa ka ka molomo oa hao.
Uena ea hloileng khalemo,
ea furallang lipolelo tsa ka?
EA TSAMAEANG TSELENG EA ‘NETE KE TLA ‘MONTSA PHOLOHO EA MOLIMO.
U nts’u etsa tjee, ebe u re nka thola?
U hopola hore ke tšoana le uena?
Ea ‘nyehelang sehlabelo sa teboho oa ntlhompha,
ea tsamaeang tseleng ea ‘nete
ke tla ‘montša pholoho ea Molimo.
EA TSAMAEANG TSELENG EA ‘NETE KE TLA ‘MONTSA PHOLOHO EA MOLIMO.
Ho baloa Evangeling e halalelang e ngotsoeng ke Matheus
(10: 34-11:1)
“Ha kea tlisa khotso, empa sabole.”
Ka nako eo, Jesu a re ho baapostola ba hae: Se nahaneng hore ke tlisitse khotso lefatšeng; ha kea tlisa khotso, empa sabole. Efela ke tlile ho fapanya motho le ntat’ae, morali le ‘m’ae, ngoetsi le matsal’a eona; ‘me lira tsa motho e tla ba ba lelapa labo.
Ea ratang ntat’ae le ‘m’ae ho mpheta ha a ntšoanele; ea ratang mora kapa morali ho mpheta ha a ntšoanele. Ea sa nkeng sefapano sa hae, a ntšala morao, ha a ntšoanele. Ea fumaneng bophelo ba hae, bo tla mo lahlehela; athe ea lahlehetsoeng ke bophelo ba hae ka baka la ka o tla bo fumana.
Ea le amohelang oa nkamohela; ‘me ea nkamohelang o amohela ea nthomileng. Ea amohelang moprofeta ka hore ke moprofeta o tla fumana moputso oa moprofeta; ‘me ea amohelang ea lokileng ka hore ke ea lokileng o tla fumana moputso oa ea lokileng. Mang le mang ea tla fa e mong oa ba banyenyane bana mohope feela oa metsi a batang, ka hore ke morutuoa, ruri kea le bolella, a ke ke a hloka moputso oa hae.
Ha etsahala hore ha Jesu a qetile ho laela barutuoa ba leshome le metso e ‘meli, a tlohe moo ho ea ruta le ho khothatsa metseng e ka mathoko.
