Moeletsi oa Basotho Beke ea 4 ea Advente
‘Mantaha
Ho baloa Bukeng ea Pele ea Samuele. (1:24-28)
“Anna o lebohela tsoalo ea Samuele.”
Matsatsing ao, hoba Anna a khoise Samuele, a tsamaea le eena a qhoba pohoana ea mohatelo, a nkile seshobana sa phofo le lekuka la veine, a mo isa Shilo tlung ea Morena. Moshanyana o n’a sa fokola.
Ha hlajoa khomo, ‘me ngoana a tlisoa ho Elia. Anna a re: Ak’u ‘mamele, moren’a ka! Ke u hlapanyetsa ho phela, moren’a ka: ke ‘na mosali eane, ea na beng a eme hona mona pel’a hau, a rapela Morena. Ke eena moshanyana eo ke neng ke ikopela eena. Morena o ananetse kopo ea ka. Joale le ‘na ke mo abela Morena, ‘me efela e tla ba ea abetsoeng Morena matsatsi ‘ohle a bophelo ba hae.
Eaba ba khumamela Morena hona moo.
PESALEMA (1 Sam 2,1.4-8. R. 1)
PELO EA KA E THABETSE MORENA, MOPHOLOSI OA KA.
Pelo ea ka e thabetse Morena,
ke tsoha molota ka baka la Molimo oa ka.
Ke tlepa lira tsa ka litšeho,
hobane ke thabetse pholoho ea hau.
PELO EA KA E THABETSE MORENA, MOPHOLOSI OA KA.
Liqha tsa bahale li robehile,
athe ba fokolang ba itlamme thekeng ka matla
Ba neng ba khora ba ikhirisetsa lijo;
athe ba neng ba lapa ha ba sa hloka ho sebetsa
Nyopa e beleha hasupa,
athe ea bana ba bangata o saretsoe.
PELO EA KA E THABETSE MORENA, MOPHOLOSI OA KA.
Morena o laola lefu le bophelo,
o theolela Qalong-ea-bafu, a be a inole.
Morena oa futsanehisa ‘me oa ruisa;
oa kokobetsa, a be a phahamise.
PELO EA KA E THABETSE MORENA, MOPHOLOSI OA KA.
O ntša mofutsana litholeng,
o nyolla mohloki thotobolong,
ho mo beha har’a mahosana
le ho mo fa setulo sa tlhompho.
PELO EA KA E THABETSE MORENA, MOPHOLOSI OA KA.
Ho baloa Evangeling e halalelang e ngotsoeng ke Luka. (14:6-56)
“Ea matla-‘ohle o nketselitse tse kholo.”
Ka nako eo, Maria a re: Pelo ea ka e tlotlisa Morena, moea oa ka o thabetse Molimo Mopholosi oa ka. O bone ho eiseha ha lekhabunvane la hae; ho tloha joale meloko eohle e tla mpitsa ea lehlohonolo, hobane Ea matla-‘ohle o nketselitse tse kholo.
Lebitso la hae halalela. Mohau oa hae o aparela ba mo tšabang, ka meloko le meloko. O sebelitse tse matla ka letsoho la hae, o qhalantse ba pelo li ikhohomosang.
O theotse ba matla literoneng, o phahamisitse ba eisehang. Ba lapileng o ba khorisitse tse molemo, ba ruileng o ba tebetse ba se na letho, O thusitse Israele mohlanka oa hae, a sa lebale ho paka mohau oa hae, joalokaha a n’a baletse bo-ntat’a rona, Abrahama le litloholo tsa hae kamehla eohle.
Maria a lula le Elisabetha likhoeli tse batlileng ho ba tharo, a nt’o boela tlung ea hae.
