Tšeliso Thakholi Ka sepheo sa ho loantša leqeme la tlhokahalo ea mesebetsi ho bacha, Kampani ea Samsung Electronics ka kopanelo le Sekolo sa Mahlale le Mesebetsi ea Matsoho sa Lerotholi, li ile tsa tšoara mokete oa boraro oa phano ea mangolo ho baithuti ba 41 ba sehlopha sa Samsung Innovation Campus Programme(SIC) ba phethetseng ka katleho e kholo lithuto tsa bona tsa Coding & Programming le Artificial Intelligence. Mokete ona o ne o tšoaretsoe Lerotholi, Maseru mafelong a beke.
Lithuto tsena tse ikemetseng tsa mahlale a tšebeliso ea marang-rang li reretsoe ho ntlafatsa menyetla ea khiro ho baithuti le ho itlhahisetsa mesebetsi matsatsing ana a bophelo ba morao-rao ba tšebeliso e phahameng ea marang-rang. Lithuto tsena li boetse li thusa ho ba matlafatsa ka litsebo le boiphihlelo ba bona litabeng tsa marang-rang.
H’a nehelana ka mangolo ho baithuti moketeng ona Letona la Thuto le Koetliso, Prof. Ntoi Rapapa o qalile pele ka ho thoholetsa le ho leboha barupeli le Samsung ka mosebetsi o motle oo ba o etsang oa ho matlafatsa le ho hlahlella baithuti ka litsebo tsa tšebeliso ea mahlale le marang-rang. A re tšebeliso ea marang-rang e bohlokoa haholo mafapheng a fapakaneng a bophelo a kenyeletsang har’a a mang a temo kaha ho e-na le mofuta oa ‘App’ o ka sebelitsoang ho matlafatsa litaba tsa temo.
A re lithuto tsena li tlil’o thusa bacha ho itlhahisetsa mesebetsi. A khothatsa le ho lebohela baithuti ba neng ba abeloa mangolo ka ho ba kopa ka matla a maholo ho tiisa ha ba kopana le liqholotso. A leboha batsoali ba ileng ba itela le ho itebala molemong oa thuto ea bana ba bona kaha moithuti ea fuoeng thuto ho se motho ea ka e nkang, ‘me e le ea hae bophelo bohle ba hae. A ba hlokomelisa hore thuto ke sebetsa ba bohlokoa. A khothaletsa batsoali ho tsetela thutong ea bana ba bona kaha e le bohlokoa ho feta tsohle.
Puong ea hae moketeng ona Motsamaisi oa Sekolo sa Lerotholi, Prof. Spirit Tlali o boletse hore mokete ona ha se feela phano ea mangolo empa ke ho matlafatsa baithuti ka litsebo le ho sebeletsa hore ba tsebe ho ba le boiphihlelo litabeng tsa ho itlhahisetsa mesebetsi e fapakaneng le ho ba le menyetla ea ho hiroa lefatše ka bophara, ka lebaka la litsebo tse phehameng tseo ba nang le tsona tsa tšebeliso ea marang-rang. A re har’a baithuti ba ngoahola ba seng ba ile ba abeloa mangolo ba bararo ba fumane mosebetsi ha a le mong a iqalletse khoebo ea hae.
A re Sekolo sa Lerotholi se tsepame haholo holima bokhabane ba thuto ba hore baithuti ha ba qeta ho phethela lithuto tsa bona ba itlhahisetse mesebetsi ka litsebo tseo ba nang le tsona. A tiisa hore mofuta oa litsebo tseo ba nang le tsona ke tse hlokoang ke naha; ka hona lithuto tsa mahlale tse tšehelitsoeng ke Samsung ke monyetla o moholo oa ho pepesa baithuti ba nang le litsebo tsa ho hiroa tsa marang-rang. A leboha tšebelisano e mofuthu le tšehetso e matla e fanoang ke Samsung mabapi le lithuto tsena.
Tlotla Lekolomi le Moswati Shabalala lebitsong la baithuti ba amohetseng mangolo ba lebohile tšehetso le tšebelisano ‘moho eo ba ileng ba e fumana lipakeng tsa bona le barupeli, botsamaisi ba sekolo le ho leboha Samsung ka ho khetholoha ka Manane-Thuto ana a bohlokoa, a tlil’o ntlafatsa le ho tlisa liphetoho bophelong ba bana ba Basotho.
